გიორგი გახარია: პოლიციელზე ძალადობას შესაბამისი რეაგირება აუცილებლად მოჰყვება

21-04-2019

პანკისში, სადაც ცოტა ხნის წინ მოსახლეობა სამართალდამცავებს ფიზიკურად დაუპირისპირდა, შინაგან საქმეთა მინისტრი, გიორგი გახარია ჩავიდა.

მინისტრის თქმით, შსს-ს თითოეული ძალოვანი, რომელიც დღეს პანკისშია, იცავს ქვეყნის ინტერესებს.

"მოხდა გარკვეული ექსცესი, რის გამოც დაიძაბა ვითარება და ყველაფერს მივხედავთ ისე, როგორც საჭიროა", - განაცხადა გახარიამ.

შინაგან საქმეთა მინისტრის თქმითვე, დაპირისპირებისას შსს-ს 15 თანამშრომელი დაზარალდა.

"აგრესია გამოიწვია იმან, რომ შსს-ს სახელმწიფო წარმომადგენლებს დაუშინეს ქვები. ეს დაუშვებელია. თუ იძალადებენ პოლიციაზე, შსს მოახდენს შესაბამის რეაგირებას", - აღნიშნა გიორგი გახარიამ.

პანკისის ხეობაში მოსახლეობა დღეს დილიდან ჰესის მშენებლობას აპროტესტებდა.

დაახლოებით 14:20 საათისთვის კი ადგილზე ვითარება უკიდურესად დაიძაბა. მოსახლეობამ პოლიციას ქვები დაუშინა, რის შემდეგაც სამართალდამცავებმა რეზინის ტყვიები და ცრემლსადენი გაზი გამოიყენეს.

დამწვარია პოლიციის მანქანები. დაზიანებულია სპეცტექნიკა.