შავი სიის კანდიდატი ,,ინშაათ საქართველო" შიდა ქართლში კვლავ ტენდერებისთვის იბრძვის

25-09-2019

კომპანია ,,ინშაათ საქართველო" შიდა ქართლში კვლავ გამოჩნდა. ამჯერად, კასპის მუნიციპალიტეტში. კომპანიის წარმომადგენლები აცხადებენ, რომ მდინარე ლეხურას გამწმენდ სამუშაოებისთვის გამოცხადებულ ტენდერში დისკვალიფიკაცია უსამართლოდ მისცეს.

კერძოდ, საქმე ქალაქ კასპში, მდინარე ლეხურას კალაპოტის გაწმენდით სამუშაოებს ეხება. ტენდერში, რომლის საწყისი ღირებულება 780 510 ლარი იყო, ,,ინშაათ საქართველომ" 546 000 ლარი მიუთითა.

კომპანია ,,ჯორჯიან ენერჯის" წარმომადგენელმა შესყიდვების სააგენტოს მიმართა და აღნიშნა, 

რომ ,,ინშაათ საქართველოს" დისკვალიფიკაცია უნდა მიენიჭოს:

,,კასპის მუნიციპალიტეტის მერიის სატენდერო კომისიამ, სატენდერო დოკუმენტაციის უგულებელყოფით, ისე რომ არ მოახდინა პრეტენდენტის მიერ წარდგენილი დოკუმენტაციის სრულყოფილი და კვალიფიციური შესწავლა, ნაცვლად იმისა, რომ მოეხდინა შპს „ინშაათ საქართველო Inshaat Georgia”-ს დისკვალიფიკაცია, მიიღო დაუსაბუთებელი და უკანონო გადაწყვეტილება და შპს „ინშაათ საქართველო Inshaat Georgia” გამოავლინა გამარჯვებულად" - აღნიშნავს ,,ჯორჯიან ენერჯის" წარმომადგენელი.

კერძოდ, მომჩივანის ცნობით, გამარჯვებული კომპანია ვალდებულია ანალოგიური სამუშაობის განხორციელების დამადასტურებელი ინფორმაცია წარადგინოს. კასპის მერიაში წარადგინა დოკუმენტაცია, თუმცა არასრულყოფილად:

,,ასე მაგალითად, საანგარიშო პერიოდში განხორციელებული პროექტებიდან ანალოგიური ხასიათისა და შინაარისის პროექტებს მიეკუთვნება 5.5 მლნ ლარის ღირებულების პროექტები. პრეტენდენტმა, დამატებით უნდა წარმოადგინოს შესაბამისი დადასტურებული საგადასახადო ანგარიშ-ფაქტურები (ასეთის არსებობის შემთხვევაში), რომელიც უნდა ედრებოდეს საბოლოო მიღება-ჩაბარების აქტში დაფიქსირებულ ფაქტობრივად შესრულებული სამუშაოების ჯამურ ღირებულებას. აღსანიშნავია, რომ პრეტენდენტის მიერ წარმოდგენილი არ არის საგადასახადო ანგარიშ-ფაქტურები, რომლითაც უნდა დადასტურებულიყო ანალოგიური სამუშაოების ნამდვილობა. " - აღნიშნავს მომჩივანი.

ვიდრე დავების საბჭოში განხილვა მიმდინარეობდა, კასპის მერიამ ,,ინშაათ საქართველოს" დისკვალიფიკაცია მისცა, თუმცა არა იმ მოტივით, რომ ანალოგიური სამუშაოები არ ჰქონდა შესრულებული, არამედ არ დაელოდა 5-დღიან ვადას ხარჯთაღრიცხვის დასაზუსტებლად.

,,ჩვენი დისკვალიფიკაცია კასპის მერიამ უსაფუძვლოდ მიიღო, რადგან დოკუმენტის დასაზუსტებლად გვქონდა 5-დღიანი ვადა. კასპის მერიამ კი, 3 დღის შემდეგ მიიღო დისკვალიფიკაციის გადაწყვეტილება" - აღნიშნავს ,,ინშაათ საქართველოს" წარმომადგენელი. მანაც საჩივრით შესყიდვების სააგენტოს მიმართა.

ინშაათ საქართველოს შესახებ

ეს ის კომპანიაა, რომელიც 2017-2018 წლებში გორში სადგურის დასახლებაში საბავშვო ბაღს აშენებდა. შიდა ქართლის საინფორმაციო ცენტრმა ექსკლუზიურად მოიპოვა მასალები იმის შესახებ, რომ საბავშვო ბაღის მშენებლობა უხარისხო ბეტონით ხორციელდებოდა. 2019 წელს ნახევრად აშენებული ბაღი დაანგრიეს.

"შიდა ქართლი"