გიორგი გახარია: გუდაურსა და ბაკურიანში წყალმომარაგების პრობლემა არ უნდა ყოფილიყო

9-01-2020

საქართველოს პრემიერ-მინისტრმა გიორგი გახარიამ მთავრობის სხდომაზე განაცხადა, რომ ის ძალისხმევა, რომელსაც ბოლო წლების განმავლობაში საქართველოს მთავრობა ახორციელებს ქვეყანაში ტურისტების მოზიდვის თვალსაზრისით, არის უაღრესად გასაფრთხილებელი.

პრემიერმა ზამთრის კურორტებზე წლის დასაწყისში შექმნილი გარკვეული გართულებების შესახებ ისაუბრა, რომელიც წყალმომარაგების თვალსაზრისით იყო, როგორც გუდაურში, ასევე ბაკურიანში. გიორგი გახარიას თქმით, გამომწვევი მიზეზები უკვე ცნობილია. პრემიერმა ხაზი გაუსვა, რომ საჭირო იყო უფრო მეტი პრევენციული მუშაობა.

„ერთმნიშვნელოვნად, პირდაპირ უნდა ვთქვათ, რომ ჩვენ ეს პრობლემა უნდა მოგვეგვარებინა. ეს არ უნდა მომხდარიყო მიუხედავად იმისა, რომ დღეს ზუსტად ვიცით, გამომწვევი მიზეზები იყო, როგორც ობიექტური ძირითადად, ასევე სუბიექტური ფაქტორები. გვესმის, რომ პრობლემა არის საკმაოდ სისტემური. გვესმის, რომ შესაბამისი დასკვნებია გასაკეთებელი, რომლებიც უკვე გაკეთდა და ჩვენ 2020 წელი უნდა დავუთმოთ სრულად იმას, რომ მომავალ წელს მსგავსი შემთხვევები აღარ გვქონდეს“, - განაცხადა პრემიერ-მინისტრმა.