სამართლიანად ჩატარდა თუ არა არჩევნები
აფხაზეთის ფსიქიატრიულის ექიმები პაციენტების ოჯახებს ნათესავების შინ წაყვანას სთხოვენ - ე.წ. ომბუდსმენის სკანდალური ანგარიში
12-02-2020
ოკუპირებული აფხაზეთის, მთავარი ფსიქიატრიული საავადმყოფოს პაციენტების ოჯახის წევრებმა სააშკარაოზე გამოიტანეს ის პრობლემები, რომელიც დაწესებულებაში დაგროვდა. მათ ადგილობრივ ე.წ. ომბუდსმენს, ასიდა შაკრილს მიაწოდეს ინფორმაცია, სადაც აღნიშნულია, რომ დაწესებულების ფინანსური პრობლემების გამო, პაციენტები პრაქტიკულად ვერ მკურნალობენ.
abkhaz-auto.ru-ს ცნობით, აფხაზეთის ე.წ. ჯანდაცვის სამინისტრო ყველაფერს უარყოფს და აცხადებს, რომ სკანდალი ხელოვნურად არის ატეხილი, ვინაიდან დაწესებულებისთვის ფინანსური დახმარება არ შეუწყვიტავთ.
როგორც 5 თებერვალს ე.წ. ომბუდსმენმა შაკრილმა განაცხადა, სპეციალიზებული ფსიქიატრიული საავადმყოფოს ექიმებმა ბენეფიციართა ოჯახის წევრებს მიმართეს, რათა მათ თავიანთი ოჯახის წევრები შინ წაეყვანათ. ექიმების მიმართვის მიზეზი, ბოლო სამი თვის განმავლობაში საავადმყოფოსთვის ყოველგვარი დაფინანსების არ არსებობა გახდა. ფსიქიატრიული საავადმყოფო ვერ აკმაყოფილებს ელემენტარულ ნორმებს და, შესაბამისად, პაციენტებს ვერც მკურნალობით უზრუნველყოფს.
ექიმების თქმით, ეს პირველი შემთხვევა არ არის, როდესაც საავადმყოფო დაფინანსების გარეშე დარჩა. 2019 წელს პაციენტებს 5 თვის განმავლობაში არ მიეწოდებოდათ მათთვის აუცილებელი მედიკამენტები.
"დაწესებულება დახურულია და ომბუდსმენს ხშირად იქ მოხვედრის შესაძლებლობა არ აქვს, რათა შეამოწმოს, რა ვითარებაა შიგნით და რამდენად ირღვევა პაციენტთა უფლებები. თუმცა, როდესაც იქაურობა ვნახე, ეს ძალიან მძიმე აღმოჩნდა. მაინტერესებდა, სად და რა პირობებში ინახებოდა კვების პროდუქტები - ყველაფერი ცარიელი იყო. მთავარი ექიმი წუხდა, რომ პაციენტებისთვის ხარისხიანი საკვების შეძენა არ შეუძლიათ", - წერს შაკრილი, რომლის თქმითაც, არასტაბილური დაფინანსება არა მხოლოდ პაციენტების მკურნალობაზე, არამედ მათ არასრულსფასოვან კვებაზეც აისახება.
