სოფელ გლოლაში ახალი საბავშვო ბაღი გაიხსნა

6-02-2018

დღეს, 5 თებერვალს, ონის მუნიციპალიტეტის სოფ. გლოლაში საბავშვო ბაღი გაიხსნა, სადაც ადრეული და სკოლამდელი ასაკის 9 აღსაზრდელი სასიამოვნო გარემოში შეძლებს წინასასკოლო მომზადებას. საბავშვო ბაღი აღჭურვილია თანამედროვე, ეკოლოგიურად უსაფრთხო ინვენტარით.

საბავშვო ბაღის საზეიმო გახსნას რაჭა-ლეჩუმ-ქვემო სვანეთის გუბერნატორი - არჩილ ჯაფარიძე, ონის მუნიციპალიტეტის მერი - ემზარ საბანაძე და ადგილობრივი ხელისუფლების სხვა წარმომადგენლები დაესწრნენ.  ბავშვებს წინასასკოლო მზადებისათვის საჭირო საჩუქრები გადაეცათ.  მუნიციპალიტეტის მკვიდრმა მეწარმეებმა- რევაზ რაზმაძემ და ირაკლი ჩაგელიშვილმა, ბაღს ფულადი საჩუქარი გადასცეს.

შეგახსენებთ, რომ სოფელ გლოლაში  საბავშვო ბაღი 1994 წლიდან აღარ ფუნქციონირებდა.