გამოკითხვა
სამართლიანად ჩატარდა თუ არა არჩევნები

სხვა გამოკითხვები

არქივი

«    მარტი 2024    »
 123
45678910
11121314151617
18192021222324
25262728293031

მიხეილ ყაველაშვილი: თქვენ თვითონ შეინახეთ თქვენივე პარტიული ტელევიზიები

22-03-2020

საპარლამენტო უმრავლესობის წევრი მიხეილ ყაველაშვილი ტელეკომპანიებისთვის ინკასოს დადების საკითხს სოციალურ ქსელში ეხმაურება.

მისი თქმით, ტელევიზიების დაფინანსება ბიუჯეტის სახსრებით არ უნდა მოხდეს:

„რამდენიმე დღეა გრძელდება ეს ისტერიკა და არ შემიძლია არ გამოვეხმაურო იმ აბსურდულ აჟიოტაჟს, ვითომ საქართველოში „თავისუფალ მედიას“ სახელმწიფო ინსტიტუტები ინკასოთი „ებრძვიან“.

ჯერ ერთი, რატომ ფიქრობენ ამ ტელევიზიების ხელმძღვანელები, მფლობელები და მათი პოლიტიკური პატრონები, რომ ამ გაჭირვების ჟამს, როდესაც მთელი მსოფლიო და მათ შორის ჩვენი ქვეყანა ახალ კორონავირუსს ებრძვის, ჩვენი მოსახლეობის კუთვნილი, ბიუჯეტის სახსრებით უნდა მოხდეს მათი პარტიული ტელევიზიების დაფინანსება?!

მეორეც, ფაქტია, ერთი ტელევიზია „ნაციონალური მოძრაობის“ ერთ დანაყოფს ეკუთვნის, მეორე - მეორეს; ჰოდა, ჩემო ბატონებო, თუკი ასე შეგტკივათ გული საკუთარ ტელევიზიებზე, რომელიც სწორეთ თქვენი პოლიტიკური ტყუილების ტირაჟირებითაა დაკავებული, ადექით და თქვენ თვითონ შეინახეთ თქვენივე პარტიული ტელევიზიები, ან პირადად თქვენ დააფინანსეთ, ან თქვენს მხარდამჭერებს, ამ ტელევიზიების ტყუილებით ნაკვებ პარტიულ აქტივს სთხოვეთ ე.წ. თავისუფალი მედიისათვის თანხის შეგროვება. ბიუჯეტს, ჩვენი მოსახლეობის კუთვნილ თანხებს თავი დაანებეთ

რაც შეეხება იმას, თუ რა მოხდა რეალურად:

ამ თემასთან დაკავშირებით, ფინანსთა მინისტრმა ამომწურავი განცხადება გააკეთა და ხაზგასმით აღნიშნა, რომ ამა თუ იმ კომპანიისთვის ინკასოს დადება ავტომატურად ხდება და ამ კუთხით, ბუნებრივია, არც ესა თუ ის ტელევიზია წარმოადგენს გამონაკლისს. ასევე, თუკი ამ ტელევიზიებს პანდემიის გამო შექმნილი ვითარების გათვალისწინებით, საშეღავათო პირობებით სარგებლობა სურდათ, შემოსავლების სამსახურში შესაბამისი ფორმა ელექტრონულად უნდა შეევსოთ და ინკასო არ დაედებოდათ. ნუთუ დაეზარათ? საზოგადოებამ ისიც კარგად უნდა იცოდეს, რომ ეს ტელევიზიები არც კორონავირუსის პანდემიამდე იხდიდნენ გადასახადს ინკასოს დადების გარეშე და მუდმივად „ქვემოდან გამოძრომას ცდილობდნენ“. ახლა კი შანსი მიეცათ და არსებული მძიმე ვითარების ფონზე, კრიზისით ისარგებლეს, სრულიად აბსურდული პანიკა ატეხეს და ამაზრზენ და უსინდისო ტყუილს ავრცელებენ, ვითომდა ხელისუფლება სხვა ტელევიზიებს ანებივრებს და ინკასოს არ ადებს...

წესით, ამ ადამიანებს კარგად უნდა ახსოვდეთ, რომ 1 ოქტომბერს შედგა შეთანხმება, რომლის მიხედვითაც, ძველ დავალიანებაზე, მაგალითად, იმაზე, რომელიც დააგროვა ნიკა გვარამიამ, როდესაც „რუსთავი 2“-ს ძარცვავდა და „იმედისა“ და „მაესტროს“ ძველი დავალიანება, რომელიც ამ ტელევიზიებმა გვარამიას წამხედურობით დააგროვეს, შეთანხმდნენ და დადგინდა გადახდის გრაფიკი. შეთანხმება ითვალისწინებდა იმასაც, რომ 1 ოქტომბრის შემდეგ, ტელევიზიების, მიმდინარე გადასახადი ჩვეულ რეჟიმში უნდა გადაეხადათ. მიუხედავად ამისა, როგორც უკვე აღვნიშნე, ტელევიზიები, რომელთაც ინკასო დაედოთ და დღეს აპოკალიფტური სურათის დახატვას ცდილობენ, არც 1 ოქტომბრის შემდეგ იხდიდნენ მიმდინარე გადასახადს - ამით უკვე ყველაფერი გასაგებია.

P.S. ამ ყველაფერში, რა თქმა უნდა, ყველაზე სამარცხვინო ის ფაქტია, რომ „ერთიანი ნაციონალური მოძრაობა“ თავისუფალი მედიისთვის შექმნილ აბსურდულ საფრთხეებზე საუბრობს; ეს ის ხალხი არაა, ხელისუფლებაში ყოფნის დროს, სრულიად რომ მოსპეს და ჩაახშეს თავისუფალი სიტყვა საქართველოში“, - წერს მიხეილ ყაველაშვილი.

ცნობისთვის, დღეს, 22 მარტს, ფინანსთა მინისტრმა ივანე მაჭავარიანმა უწყებათაშორისი საკოორდინაციო საბჭოს შეხვედრის დასრულების შემდეგ ჟურნალისტებთან საუბრისას განაცხადა, რომ ბოლო რამდენიმე თვე ტელემაუწყებლები ნებაყოფლობით არ იხდიდნენ გადასახადებს, რის გამოც მათგან გადასახადის ამოღება ინკასოს დადების გზით ხდებოდა და საუბარი იმაზე, რომ რომელიმე ორგანიზაციას ინკასო სპეციალურად დაადეს, აბსოლუტური სპეკულაციაა.