ლენტეხსა და ხაშურის სოფელ ხიდისყურში მკაცრი საკარანტინო შეზღუდვები მოიხსნა

28-04-2020

პრემიერ-მინისტრ გიორგი გახარიას ხელმძღვანელობით მოქმედი უწყებათაშორისი საკოორდინაციო საბჭოს გადაწყვეტილებით, ლენტეხსა და ხაშურის მუნიციპალიტეტის სოფელ ხიდისყურში მკაცრი საკარანტინო შეზღუდვები მოიხსნა. აღნიშნული გადაწყვეტილება საკოორდინაციო საბჭომ ამ რეგიონებში განხორციელებული მიზნობრივი ღონისძიებების შედეგად ადგილზე არსებული ეპიდემიოლოგიური ვითარების გათვალისწინებით მიიღო.

სხდომაზე აღინიშნა, რომ ლენტეხის მუნიციპალიტეტის 4 300 და სოფელ ხიდისყურის 80 მცხოვრებს რამდენჯერმე ჩაუტარდა პროაქტიული თერმოსკრინინგი - ასევე, მიზნობრივი ტესტირებები ჩაუტარდა ინფიცირებულთა ყველა კონტაქტს.

შესაბამისად, დღეიდან ლენტეხის მუნიციპალიტეტსა და ხაშურის მუნიციპალიტეტის სოფელ ხიდისყურში მოქმედებს ის რეჟიმი, რაც მთელი ქვეყნის მასშტაბით საგანგებო მდგომარეობით არის დადგენილი.

საბჭომ ასევე განიხილა შეზღუდვების მოხსნის და ეკონომიკური გახსნის პირველი ეტაპის ფარგლებში მიმდინარე აქტივობები, მათ შორის ჯანდაცვის სამინისტროს მიერ დადგენილი წესებისა და უსაფრთხოების ნორმების დაცვის კუთხით.

აღინიშნა, რომ დღის ბოლოს ვადა ეწურება უწყებათაშორისი საბჭოს გადაწყვეტილებით ორი დღის განმავლობაში მოქმედ საგამონაკლისო წესს, რომლითაც მოქალაქეებს 4 დიდ ქალაქში - თბილისში, რუსთავში, ბათუმში და ქუთაისში შესვლის უფლება მიეცათ ფაქტობრივ საცხოვრებელ მისამართზე დაბრუნების მიზნით. საგანგებო მდგომარეობის ფარგლებში დაწესებული ყველა სხვა შეზღუდვა ძალაში რჩება. მათ შორის, ძალაშია კომენდანტის საათის მოქმედება 21:00 საათიდან 06:00 საათამდე.

ეკონომიკისა და მდგრადი განვითარების სამინისტრომ საბჭოს მიაწოდა ინფორმაცია საწარმოებში ჯანდაცვის სამინისტროს რეკომენდაციებისა და უსაფრთხოების წესების დაცვის პროცესის მონიტორინგის შესახებ. მინისტრის განმარტებით, ბოლო პერიოდის განმავლობაში ინსპექტირება განხორციელდა ათობით საწარმოში, რომელთა უმეტესობა წესებს აკმაყოფილებს, შესაბამისად ისინი ფუნქციონირებას განაგრძობენ. ის საწარმოები კი, სადაც ხარვეზები გამოვლინდა, განმეორებით შემოწმდებიან.

სხდომაზე ასევე ისაუბრეს საქართველოს ხელისუფლების მიერ წარდგენილ მიზნობრივ სოციალურ და ეკონომიკურ ანტიკრიზისულ გეგმაზე, რომლის ფარგლებში, თითოეული დარგობრივი სამინისტრო მიმდინარე კვირას დეტალურ პრეზენტაციებს გამართავს. პირველ პრეზენტაციას ფინანსთა სამინისტრო დღეს წარადგენს, რომელზეც მიზნობრივი სოციალური დახმარებების გაცემასთან დაკავშირებით საზოგადოებას დეტალურ ინფორმაციას მიაწვდის.

უწყებათაშორისი საბჭოს სხდომაზე განიხილეს კლინიკებში არსებული მდგომარეობა, თავისუფალი საწოლების რაოდენობა და სამედიცინო პერსონალის მზადყოფნის ხარისხი.

აქტიურად გრძელდება სამედიცინო პერსონალის ტრენინგების ეფექტურობისა და უწყვეტობის კონტროლი და კლინიკების მონიტორინგი პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძის ხელმძღვანელობით. პროცესი მაჟორიტარი დეპუტატებისა და ადგილობრივი ხელისუფლების წარმომადგენლების ჩართულობით, ჯანდაცვის სამინისტროსა და ოპერაციულ შტაბთან სრულ კოორდინაციაში ხორციელდება.

საკოორდინაციო საბჭოს სხდომაზე ასევე განიხილეს სასურსათო და სამედიცინო საშუალებების მარაგების კუთხით ქვეყანაში არსებული მდგომარეობა. გარემოს დაცვისა და სოფლის მეურნეობის მინისტრმა ლევან დავითაშვილმა აღნიშნა, რომ სასურსათო მარაგების კუთხით ქვეყანაში პრობლემა არ არსებობს და მისი მუდმივი შევსება შეუფერხებლად ხორციელდება. საქართველოს მასშტაბით აგრარულ ბაზრებზე მიმდინარეობს შრომის უსაფრთხოების წესების დანერგვა. მინისტრის ინფორმაციით, ამ მომენტისთვის საქართველოში რეგისტრირებულია 80 აგრარული ბაზარი, რომელთა უმრავლესობა ჰიგიენური და სანიტარული სტანდარტების დაცვისა და ინფექციის გავრცელების რისკის შემცირების მიზნით შემუშავებულ მოთხოვნებს ვერ აკმაყოფილებს, შესაბამისად, მსგავსი აგრარული ბაზრები ფუნქციონირების გაგრძელებას ვერ შეძლებენ.

უწყებათაშორისი საბჭოს სხდომაზე აღინიშნა, რომ გრძელდება საზღვარგარეთ მყოფი საქართველოს მოქალაქეების სამშობლოში დაბრუნების პროცესი. საგარეო საქმეთა მინისტრ დავით ზალკალიანის ინფორმაციით, სპეციალური რეისების შედეგად, რომლებიც ჯანმრთელობის მსოფლიო ორგანიზაციის რეკომენდაციების შესაბამისად ხორციელდება, სამშობლოში უკვე დაბრუნდა 8 372 მოქალაქე, ხოლო 16 302 მოქალაქეს საქართველოს დიპლომატიურმა წარმომადგენლობებმა ადგილზე გაუწიეს დახმარება.

სხდომაზე ასევე განიხილეს ქვეყანაში არსებული ეპიდემიოლოგიური მდგომარეობა. დღევანდელი მონაცემებით, საქართველოში კორონავირუსით ინფიცირების 511 დადასტურებული შემთხვევაა, საიდანაც 156 პირი უკვე გამოჯანმრთელდა. უცხოეთიდან სამკურნალოდ სამშობლოში გადმოყვანილია საქართველოს 3 მოქალაქე. გარდაცვლილია 6 ადამიანი.

ინფიცირებულ პირებს შესაბამისი მკურნალობა უტარდებათ. ამ ეტაპზე კარანტინში იმყოფება 5085 ადამიანი, ხოლო სტაციონარში, მეთვალყურეობის ქვეშ - 558 პირი.

უწყებათაშორისი საკოორდინაციო საბჭო კოორდინირებული ნაბიჯების გადადგმის მიზნით სხდომებს პრემიერ-მინისტრის ხელმძღვანელობით, ინტენსიურად, ვიდეოკონფერენციის ფორმატში განაგრძობს.

საბჭოს მუშაობაში აქტიურად მონაწილეობენ საქართველოს პარლამენტი, თავმჯდომარე არჩილ თალაკვაძის ხელმძღვანელობით და პრეზიდენტის ადმინისტრაცია.

საქართველოს ხელისუფლებამ კოვიდ19-თან ბრძოლის პროცესში ერთ-ერთ მთავარ მიმართულებად საზოგადოების სწორი და დროული ინფორმირება განსაზღვრა. ამ მიზნით, პირველივე დღიდან, ინფორმაცია ქვეყანაში არსებულ ეპიდემიოლოგიურ თუ ეკონომიკურ, ისე მოქმედი რეგულაციების მიზნობრიობისა და საჭიროების შესახებ ინფორმაცია მოსახლეობას ყოველდღიურ რეჟიმში სხვადასხვა საკომუნიკაციო არხით მიეწოდება. მთავრობის საკომუნიკაციო არხებს კიდევ ერთი ახალი პროდუქტის დაემატა - საინფორმაციო ბარათი ქვეყანაში Covid 19-ის გავრცელების პრევენციის მიზნით, ხელისუფლების მიერ განხორციელებული ღონისძიებების შესახებ. საინფორმაციო ბარათი, რომელიც ყოველდღიურად განახლებად ინფორმაციას მოიცავს, გამოქვეყნდება მთავრობის მიერ შექმნილ ვებ-გვერდზე www.StopCoV.ge.

გარდა ამისა, კორონავირუსთან დაკავშირებით საქართველოს მთავრობის მიერ შექმნილი სპეციალური ვებგვერდის StopCoV.ge-ის სიახლეების მიღება მოქალაქეებს სატელეფონო აპლიკაცია ტელეგრამის არხითაც შეუძლიათ. აპლიკაცია ტელეგრამის მომხმარებლები შეძლებენ, ახალი არხის მეშვეობით როგორც ქართულ, ისე ინგლისურ ენაზე მიიღონ სრული ინფორმაცია საქართველოში COVID-19-ის გავრცელების კუთხით არსებულ მდგომარეობასა და საქართველოს მთავრობის მიერ განხორციელებულ ღონისძიებებზე.