გიორგი ხანიშვილი გორში ფერმერებისთვის აგრობარათების დარიგების პროცესს გაეცნო

21-05-2020

გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილისახელმწიფო პროგრამის ფარგლებში ფერმერებისთვის აგრობარათების დარიგების პროცესს გორის მუნიციპალიტეტში გაეცნო. მინისტრის პირველი მოადგილე რეგიონში სოფლისა და სოფლის მეურნეობის განვითარების სააგენტოს დირექტორთან, ილია თამარაშვილთან და შიდა ქართლის რეგიონის რწმუნებულის მოადგილესთან, ნუგზარ სამხარაძესთან ერთად იმყოფებოდა.

„ჩვენთვის მნიშვნელოვანია, პროგრამა წარმატებით და შეფერხებების გარეშე განხორციელდეს.

ფერმერები პროგრამით დარიცხული ქულების გამოყენებას 2021 წლის 20 მაისის ჩათვლით შეძლებენ. მასობრივი შეკრებების თავიდან ასაცილებლად, ბანკში ვიზიტამდე, მათ დისტანციურად უნდა გადაამოწმონ ინფორმაცია ბანკის ვებგვერდზე; ფერმერებმა უნდა გააცნობიერონ, რომ ამ წესების დაცვა ძალიან მნიშვნელოვანია“, - განაცხადა გიორგი ხანიშვილმა.

შიდა ქართლის მხარის რწმუნებულის მოადგილის, ნუგზარ სამხარაძის განცხადებით, შიდა ქართლის რეგიონში აგრობარათს 40 000-ზე მეტი ფერმერი მიიღებს, რაც მათთვის მნიშვნელოვანი მხარდაჭერაა.

20 მაისიდან, ეტაპობრივად დაიწყო „სასოფლო-სამეურნეო დანიშნულების მიწის მესაკუთრეთა სტიმულირების“ პროგრამით გათვალისწინებული ქულების დარიცხვა ლიბერთი ბანკის აქტიური ანგარიშის მქონე ბენეფიციარებისათვის; ეტაპობრივად ხდება ბანკის მიერ აგრობარათების დარიგებაც. ფერმერებს უკვე შეუძლიათ დარიცხული ქულებით სასოფლო-სამეურნეო საქონლის შეძენა სპეციალიზებულ მაღაზიებში.

პროგრამით გათვალისწინებული სუბსიდიის მისაღებად საჭიროა, ფიზიკურ და იურიდიული პირებს საკუთრებაში ჰქონდეთ საჯარო რეესტრში რეგისტრირებული 0.25-დან 10 ჰა-მდე სასოფლო-სამეურნეო დანიშნულების მიწის ნაკვეთი. სუბსიდიის მოცულობა 1 ჰექტარ მიწაზე განისაზღვრა 200 ლარით (აგრობარათზე დარიცხული 200 ქულით).

პროგრამაში მონაწილეები დარიცხული ქულებისა და ბარათის მიღების თარიღის შესახებ ინფორმაციას ვებგვერდზე myliberty.ge მიიღებენ.

„სასოფლო-სამეურნეო დანიშნულების მიწის მესაკუთრეთა სტიმულირების“ სახელმწიფო პროგრამით 200 000-ზე მეტი ფერმერი ისარგებლებს. პროგრამის ბიუჯეტი 37 მილიონ ლარს შეადგენს.