კახა კალაძე: ჩვენი ყოველდღიური მუშაობითა და ქმედებებით უნდა შევქმნათ პატარ-პატარა წარმატების ისტორიები

12-10-2020

პოლიტიკური გაერთიანება ,,ქართული ოცნება - დემოკრატიული საქართველოს“ გენერალური მდივანი, კახა კალაძე ახალციხეში, ადიგენის, ახალციხის, ბორჯომისა და ასპინძის მაჟორიტარი დეპუტატობის კანდიდატის, ანტონ ობოლაშვილის წარდგენაზე სიტყვით გამოვიდა.
კალაძის გამოსვლის ტექსტს უცვლელად გთავაზობთ:

„ჩემთვის დიდი პატივია მშრომელი, პატრიოტი, საკუთარ ქალაქსა და კუთხეზე შეყვარებული ხალხის წინაშე წარვსდგე ამ ქალაქში, რომელიც ისტორიული სამცხის ცენტრი და სამხრეთ საქართველოს ერთ-ერთი გამორჩეული მარგალიტია.
აქ არსებული ციხის კედლები უამრავ საგმირო საქმეს, ვაჟკაცობის, სიყვარულისა და საკუთარი სამშობლოსთვის თავგანწირვის ძალიან ბევრ ისტორიას ინახავს. ამ ადგილებში ადამიანი ჯერ კიდევ ადრეული ბრინჯაოს ხანაში სახლობდა, თქვენი ქალაქი კი საუკუნეების მანძილზე საქართველოსთვის უდიდესი პოლიტიკური თუ ეკონომიკური მნიშვნელობის ცენტრს წარმოადგენდა.
ახალციხე განსხვავებული ეთნიკური თუ რელიგიური ჯგუფების მშვიდობიანი თანაცხოვრების ერთ-ერთი უნიკალური მაგალითია, რის განმაპირობებელიც საკუთარი სამშობლოს სიყვარული და მასზე ზრუნვაა. დღესაც გვხვდება ამ ქალაქში ისტორიული მეჩეთი, სინაგოგა, თუ ეკლესია, რომელიც ამ ქალაქს ალამაზებს და გასაკუთრებულ ხიბლს, ისტორიულ და კულტურულ დანიშნულებას სძენს.
რა თქმა უნდა, უდიდეს ისტორიულ ღირებულებასთან ერთად, არ უნდა დაგვავიწყდეს, რომ ეს ადგილები უნიკალური მინერალური და სამკურნალო წყლებით არის ცნობილი, რომელიც გამორჩეულ ბალნეოლოგიურ კურორტს ქმნის, რომლის არ გამოყენებაც კატეგორიულად მიუღებელია. ამ მიმართულებით 2012 წლის შემდეგ, რაც ხელისუფლებაში "ქართული ოცნება" მოვიდა, ვითარება მკვეთრად გაუმჯობესდა. განვლილი 8 წლის განმავლობაში, მუნიციპალიტეტში განხორციელდა უამრავი ინფრასტრუქტურული, ეკონომიკური თუ სოციალური პროექტი, რომელიც ადგილობრივი მოსახლეობის კეთილდღეობის ხარისხის ზრდაზე პირდაპირ გავლენას ახდენს.
ახალციხეში, ისევე, როგორც მთელ საქართველოში სოფლის მეურნეობისა და ტურიზმის განვითარებისთვის უამრავი პროგრამა მოქმედებს, რომელიც სახელმწიფოსა და კერძო სექტორის უნიკალური თანამშრომლობის მაგალითს, განვითარებულ ბიზნესსა და წარმოებას, ახალ სამუშაო ადგილებსა და მუნიციპალიტეტში დამატებით შემოსავლებს ქმნის.
რა თქმა უნდა, ჩვენ კარგად გვესმის, რომ წინ ჯერ კიდევ ბევრია სამუშაო, ბევრი პრობლემაა, გამოწვევები, რომელსაც სჭირდება 24-საათიანი მუშაობა. ამ ყველაფერს მხოლოდ ადგილობრივი და ცენტრალური ხელისუფლება ვერ გააკეთებს. აქაც მნიშვნელოვანია ჩვენი ერთობა.
ჩვენ, ჩვენი ყოველდღიური მუშაობითა და ქმედებებით უნდა შევქმნათ პატარ-პატარა წარმატების ისტორიები.
ერთად საქართველოს წარმატებისთვის!“, - განაცხადა კახა კალაძემ.