„პრემიერ-მინისტრმა კვირიკაშვილმა განაცხადა, რომ კახეთს სჭირდება ცალკე აეროპორტი და რომ საუბარია ამ მიზნისთვის გარკვეული თანხების დახარჯვაზე. მიგვაჩნია, რომ ეს განცხადება არის მცდარი და არაკომპეტენტური. კახეთს სჭირდება არა აეროპორტი, არამედ გომბორის უღელტეხილის ქვეშ გვირაბი, რაც დაგეგმილი იყო. ეს გვირაბი თბილისსა და თელავს შორის მგზავრობის ხანგრძლივობას 40 წუთამდე შეამცირებდა, რაც კახეთში აეროპორტის არსებობას აზრს უკარგავს. ეს გვირაბი იქნებოდა უდიდესი ბიძგი კახეთის ეკონომიკის და ტურიზმის განვითარებისთვის“, – განაცხადა გიორგი კანდელაკმა.
25 მარტს, სოფელ ახაშენში სასტუმროს „ახაშენი ღვინის კურორტი“ გახსნის ღონისძიებაზე გიორგი კვირიკაშვილმა განაცხადა, რომ კახეთს ცალკე აეროპორტი სჭირდება.
„ვფიქრობ, მივედით იმ ეტაპამდე, როდესაც კახეთს სჭირდება ცალკე აეროპორტი. ამაზე მიდის ფიქრი და ისევ და ისევ კერძო სექტორთან პარტნიორობით ჩვენ შევძლებთ, რომ კახეთში განხორციელდეს პირდაპირი ჩარტერული რეისები პირველ ეტაპზე, შემდგომში შესაძლოა, რეგულარული რეისებიც დაინიშნოს“, – აღნიშნა პრემიერმა.
კვირიკაშვილმა ტურიზმის განვითარების მხრივ რკინიგზის მნიშვნელობაზეც ისაუბრა და აღნიშნა, რომ სახელმწიფომ აუცილებლად უნდა იფიქროს კახეთში რკინიგზის აღდგენაზე.
კახეთში აეროპორტი თელავში ფუნქციონირებს, თუმცა ის საავიაციო უნივერსიტეტის მართვის ქვეშ არის და ძირითადად სასწავლო ფრენებისთვის გამოიყენება.
