ზაზა გაბუნია გორის მერთან ერთად ხურვალეთში მდებარე მოხუცთა სახლს ესტუმრა

29-03-2018

საქართველოს პარლამენტის რეგიონული პოლიტიკის და თვითმმართველობის კომიტეტის თავმჯდომარე ზაზა გაბუნია, გორის მერთან კონსტანტინე თავზარაშვილთან ერთად  ხურვალეთში მდებარე მოხუცთა სახლს ესტუმრა.

ზაზა გაბუნიამ მადლობა გადაუხადა ყველას ვინც სახლის ბენეფიციარების მიმართ მზრუნველობას იჩენენ.

თავშესაფარი ,,სახლი საზღვრებს გარეშე“ გორის მუნიციპალიტეტის მერიის მიერაა მხარდაჭერილი და სოციალური პროექტების თანადაფინანსების პროგრამის ფარგლებში ფინანსდება. მათივე ინფორმაციით, აღნიშნული მხარდაჭერის საფუძველზე ე.წ გამყოფი ხაზის სოფლების - ხურვალეთის, წითელუბნის, ნადარბაზევის, ასევე ხურვალეთისა და შავშვების დევნილთა ჩასახლებების ხანდაზმულები სარგებლობენ შინმოვლის, დღის ცენტრისა და სათემო 24 საათიანი მომსახურებით.

დღეისათვის თავშესაფარი 40 ბენეფიციარს ემსახურება, მათ შორის 8 თავშესაფარში ცხოვრობს, ხოლო 32 - მომსახურებას ოჯახში იღებს.

თავშესაფარი, სახელწოდებით ,,სახლი საზღვრების გარეშე" 2016 წელს გაიხსნა. პროექტი გერმანული ორგანიზაციის "არბაიტერ-სამარიტერ-ბუნდის", საქველმოქმედო ჰუმანიტარული ცენტრ "აფხაზეთისა" და ამერიკის განსახლების, ლტოლვილთა და მიგრაციის ბიუროს ფინანსური მხარდაჭერით განხორციელდა.