კომპანია ,,ალონისი" გორის მერიისგან 300 000 ლარს ითხოვს

4-04-2018

კომპანია ,,ალონისის" დირექტორი მაკედონ ანანიკოვი 300 000 ლარს, ამჯერად, გორის მერიისგან ითხოვს. ამის შესახებ მორიგი სასამართლო პროცესი დღეს გაიმართა. საქმე ეხება 2015 წელს შესრულებულ სამუშაოებს, რომლის ანაზღაურება, მაშინდელ გამგეობისგან, კომპანიას არ მიუღია.

2015 წლის ნოემბერში, ქარის სტიქიის დროს, გორის მუნიციპალიტეტის სოფლებში, საცხოვრებელ სახლებს სახურავები დაუზიანდა. ,,ალონისის" დირექტორი ამბობს, რომ გამგეობის თხოვნით, სახურავები ფორსმაჟორულ სიტუაციაში გადახურა. სამუშაოები ისე დაასრულა, რომ მასთან, შესყიდვების სამსახურს, ხელშეკრულებები არ გაუფორმებია.

გადაუდებელი აუცილებლობიდან გამომდინარე, პირდაპირი შესყიდვის წესით, ხელშეკრულებები ერთი თვის ვადაში უნდა გაფორმებულიყო.

,,იმის გამო, რომ ერთი თვის ვადაში ხელშეკრულებები არ გაფორმდა, დეკემბრის შემდეგ, ამის გაკეთება კანონდარღვევა იქნებოდა,' - აცხადებდნენ მაშინ გამგეობის იურისტები. ამიტომ, გორის გამგეობამ 2016 წლის იანვარში ტენდერი გამოაცხადა. ტენდერში კი, ის სახლები მიუთითა, რომელიც ,,ალონისს" უკვე გადახურული ჰქონდა.

გამოცხადებულ ტენდერში ,,ალონისს" კონკურენტები გამოუჩნდნენ და არ გაამარჯვებინეს. სავარაუდოდ კორუფციული გარიგების ფაქტზე შემოსავლების სამსახურმაც გამოძიება დაიწყო:

,,ამჯერად, ჩვენ ვითხოვთ იმ თანხის ანაზღაურებას, რომლითაც 2015 წლის ნოემბერში საცხოვრებელი სახლების სახურავების რეაბილიტაცია მოხდა. ეს სამუშაოები მაკედონ ანანიკოვმა შეასრულა გამგებლის დავალებით. შემდეგ კი, დავიწყების გამო თუ სხვა ინტერესების გამო, თანხა არ გადაუფორმა, ხელშეკრულება არ გაუფორმა," - აცხადებს ,,ალონისის" ინტერესების დამცველი ბაკურ ზურაბაშვილი.

მისი თქმით, პროცესზე დაიკითხნენ როგორც გამგებელი, ასევე, მისი მაშინდელი წარმომადგენლები სოფლებში და გუბერნატორის მოადგილე.

,,გუბერნატორის მოადგილემ თქვა, რომ მისი თანდასწრებით, სხდომაზე, ნამდვილად დაავალეს კომპანიებს რომ სახურავების გადაუხურვა დაეწყოთ, ხოლო გამგეობას ამისთვის შესაბამისი დოკუმენტაცია უნდა მოეწესრიგებინათო,' - აცხადებს ბაკურ ზურაბაშვილი. მისი განცხადებით, ეს ფაქტი მაშინდელმა გამგებელმა უარყო.

ამ ეტაპზე სასამართლოზე არსებითი განხილვა დასრულდა. მხარეები კამათის რეჟიმში გადავიდნენ. გორის გამგეობა 2017 წლის შემოდგომით გაუქმდა, მისი სამართალმემკვიდრე გორის მუნიციპალიტეტის მერიაა.

"შიდა ქართლი"