სამართლიანად ჩატარდა თუ არა არჩევნები
ახლადგახსნილი სამაცივრე მეურნეობიდან 800 ტონა მოსავლის რეალიზაცია განხორციელდა
17-07-2021
გარემოს დაცვისა და სოფლის მეურნეობის სამინისტროს პრესსამსახურის ინფორმაციით, სახელმწიფო ფინანსური მხარდაჭერით, ლევან კაციაშვილმა ახალი, თანამედროვე სტანდარტებით აღჭურვილი სამაცივრო მეურნეობა გურჯაანის მუნიციპალიტეტის სოფელ ჩუმლაყში მოაწყო; ჯამურმა ინვესტიციამ 800,000 ლარზე მეტი შეადგინა, მათ შორის, 550,000 ლარი შეღავათიანი აგროკრედიტია. სამაცივრე მეურნეობაში 300 ტონამდე ხილის შენახვაა შესაძლებელი. საწარმოში, მუდმივად 10, სეზონურად 100 ადამიანია დასაქმებული. ატმის და ვაშლატამას მოსავლის აღების სეზონის დაწყებიდან დღემდე, ახლადგახსნილი სამაცივრე მეურნეობიდან 800 ტონა მოსავლის რეალიზაცია უკვე განხორციელდა.
სამაცივრე მეურნეობაში სოფლის განვითარების სააგენტოს დირექტორი ილია თამარაშვილი კახეთის მხარის სახელმწიფო რწმუნებულთან, ირაკლი შიოშვილთან ერთად იმყოფებოდა, სადაც სამუშაო პროცესს ადგილზე გაეცნო.
„სახელმწიფოს მხარდაჭერით უკვე ასზე მეტი შემნახველი და გადამმუშავებელი საწარმოა შექმნილი; ამ მიმართულებით წელს თანადაფინანსების 51 ხელშეკრულება გაფორმდა. სოფლის განვითარების გრძელვადიანი გეგმით, პრიორიტეტულ მიმართულებად კვლავ რჩება გადამმუშავებელი და შემნახველი ინფრასტრუქტურის მხარდაჭერა. უახლოესი 10 წლის განმავლობაში, დარგის განვითარებისათვის, სახელმწიფო 700 მილიონ ლარზე მეტის დახარჯვას გეგმავს”, - განაცხადა სოფლის განვითარების სააგენტოს დირექტორმა, ილია თამარაშვილმა.
სოფლის მეურნეობის განვითარების ხელშემწყობი სახელმწიფო პროგრამები მნიშვნელოვანია რეგიონის ეკონომიკური გაძლიერებისთვის - განაცხადა კახეთის მხარის სახელმწიფო რწმუნებულმა, ირაკლი შიოშვილმა.
უწყების ცნობით, კახეთის რეგიონში, შეღავათიანი აგროკრედიტის პროექტის ფარგლებში, შემნახველი და სამაცივრო ინფრასტრუქტურის განვითარებისთვის, ჯამში, გაცემულია 84 მილიონ ლარზე მეტი ღირებულების 800-ზე მეტი სესხი, სოფლის განვითარების სააგენტოს გაცემული თანადაფინანსება 10 მლნ ლარზე მეტია.
