სამართლიანად ჩატარდა თუ არა არჩევნები
ირაკლი ღარიბაშვილი ქუთაისის საერთაშორისო უნივერსიტეტზე: ვაპირებ, რომ ჩამოვიდე, ადრონული თერაპიის ცენტრის მშენებლობას საფუძველი ჩაეყრება და ძალიან თვალსაჩინო, მართლაც გამორჩეული პროექტია ფონდი „ქართუს" და ბატონი ივანიშვილის
22-06-2022
ქუთაისის საერთაშორისო უნივერსიტეტი, მართლაც, ერთ-ერთი გამორჩეული პროექტია, ბატონი ბიძინა ივანიშვილისა და ფონდი „ქართუს", - ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტში, დეპუტატების კითხვის საპასუხოდ განაცხადა.
მისი თქმით, ეს არის ჯამში 1 მლრდ დოლარის პროექტი, რომლის განხორციელებაც წლების წინ დაიწყო ფონდმა „ქართუმ".
„ბატონი მიხეილი არის ჩართული ამ პროექტში. აქ მართლაც არის სასწაული, ბატონი რატი ბრეგაძე მიყვებოდა, რომ იყო ჩასული ქუთაისში და შეხვდა სტუდენტებს. მას თავად გერმანიაში აქვს მიღებული განათლება და შედარებისთვის მითხრა, რომ ასეთი კამპუსები, ასეთი ინფრასტრუქტურა ქვეყანაში არ არის.
ამიტომ, რა თქმა უნდა, ეს არის ძალიან მისასალმებელი, ძალიან მაგარი პროექტი და ჩვენ ახლა, ივლისის თვეში ვაპირებთ, რომ ჩამოვიდეთ, მეც ვაპირებ, რომ ჩამოვიდე, იქ ადრონული თერაპიის ცენტრი იხსნება, უფრო სწორად, საფუძველი ჩაეყრება ამ ცენტრის მშენებლობას და ძალიან თვალსაჩინო, მართლაც გამორჩეული პროექტია ფონდი „ქართუს" და ბატონი ივანიშვილის. კიდევ ერთხელ მინდა აღვნიშნო, რომ ეს არის 1 მილიარდიანი პროექტი ჯამში და მართლაც, ქუთაისში შეიქმნება ეს განათლების კერა, ცენტრი, რომელშიც ჩვენს ქართველ, გამორჩეულ სტუდენტებს შეეძლებათ ევროპული დონის უმაღლესი განათლება მიიღონ", - განაცხადა პრემიერმა.
