მამუკა მდინარაძე: ოპოზიცია, რომელიც არჩევნებამდე ერთი წლით ადრე არჩევნების დისკრედიტაციის კამპანიას თავისივე მოთხოვნილი და მხარდაჭერილი საკითხით იწყებს, გარდაუვალი მარცხისთვისაა განწირული როგორც არჩევნებში, ასევე ასეთ კამპანიებში

21-08-2023

„ქართული ოცნების“ აღმასრულებელი მდივანი მამუკა მდინარაძე არჩევნების ელექტრონული წესით ჩატარებასთან დაკავშირებით სოციალურ ქსელში პოსტს აქვეყნებს და იმ ოპოზიციური პარტიების წარმომადგენლებს პასუხობს, რომლებიც ელექტრონული წესით არჩევნების ჩატარებას აპროტესტებენ.

მისი თქმით, ელექტრონული წესით არჩევნების ჩატარებას პარტნიორი ქვეყნების ელჩების გარდა, კატეგორიულად ითხოვდა ოპოზიცია, როდესაც შარლ მიშელის შეთანხმება იქმნებოდა. 

მისივე განმარტებით, ელექტრონული წესით არჩევნებთან დაკავშირებულ კანონში შეტანილია ცვლილება, რომელსაც ოპოზიციამაც დაუჭირა მხარი.

„ოპოზიცია, რომელიც არჩევნებამდე ერთი წლით ადრე არჩევნების დისკრედიტაციის კამპანიას თავისივე მოთხოვნილი და მხარდაჭერილი საკითხით იწყებს, გარდაუვალი მარცხისთვისაა განწირული როგორც არჩევნებში, ასევე ასეთ კამპანიებში.

უფრო კონკრეტულად:

1. ელექტრონული წესით არჩევნების ჩატარებას ჩვენი პარტნიორი ქვეყნების ელჩების გარდა (მათ შორის კელი დეგნანი), კატეგორიულად ითხოვდა რადიკალური ოპოზიცია, როდესაც შარლ მიშელის შეთანხმება იქმნებოდა. შესაბამისად შეთანხმებაში ეს დათქმა მოხვდა.

2. შეთანხმების გარეშეც, წლებია ოპოზიცია ითხოვს არჩევნების დროს ელექტრონული სისტემით ხმის მიცემის შესაძლებლობას. უამრავი განცხადება და რეკომენდაციაა ამ თემაზე.

3. კანონში შევიტანეთ ცვლილება, რომელსაც ოპოზიციამაც დაუჭირა მხარი.

4. ელექტრონული არჩევნების დროს:

ა) არ იქნება დისტანციურად ხმის მიცემა!

ბ) ამომრჩეველი ხმას აძლევს საარჩევნო უბანზე, ელექტონული აპარატის მეშვეობით, რომელიც არ არის მიერთებული ქსელთან!

გ) შედეგის გადაკონტროლება ხდება ბიულეტენების ხელით გადათვლით!

კითხვა: ტექნიკურად როგორ უნდა მოხდეს მანიპულაცია, თუ აპარატი არც ქსელშია ჩართული, არც მოქალაქე აძლევს დისტანციურად ხმას და გადათვლა ხელითაც ხდება? თუ ვინმე მანიპულაციაზე მანიპულაციურად საუბრობს, ესეც უნდა ახსნას…

5. ცრუ ნარატივებით ნასაზრდოები, სასოწარკვეთილი პოლიტიკური ჯგუფები წინასწარვე ხვდებიან გარდაუვალ მარცხს.

ამავდროულად იციან, რომელიმე მდიდარი არასამთავრობო ორგანიზაციის მხრიდან პარალელური ხმის დათვლის მონაცემების გაყალბებას ან არჩევნების სხვა სახით მადისკრედიტირებელ, აგენტურულ სპეცოპერაციას აზრი აღარ ექნება. შეიძლება მეხუთე სიმბოლური პუნქტი იყოს სწორი პასუხი,ყველაფერზე“, - წერს მდინარაძე ფეისბუკზე.