გამოკითხვა
სამართლიანად ჩატარდა თუ არა არჩევნები

სხვა გამოკითხვები

არქივი

«    თებერვალი 2024    »
 1234
567891011
12131415161718
19202122232425
26272829 

გია ცაგარეიშვილი კანდიდატის სტატუსზე: მაქვს ოპტიმისტური მოლოდინი და ეს მოლოდინი არ შეცვლილა. ეს ყველაფერი მომწიფდა მიუხედავად გავეშებული ბრძოლისა, რომელსაც ქართველი ქართველის წინააღმდეგ აწარმოებს ამ ქვეყანაში

7-11-2023

„მაქვს ოპტიმისტური მოლოდინი და ეს მოლოდინი არ შეცვლილა. ერთი წლის წინ მეც და ჩემი კოლეგებიც იგივეს ვამბობდით, რომ ჩვენ აუცილებლად მივიღებთ კანდიდატის სტატუსს“-ამის შესახებ საპარლამენტო უმრავლესობის წევრმა გია ცაგარეიშვილმა ჟურნალისტებთან განაცხადა.

 

ცაგარეიშვილის თქმით, რადიკალური ოპოზიციის ყოველი ვიზიტი ემსახურებოდა იმას, რომ საქართველოს კანდიდატის სტატუსი არ მიეღო. მისივე განმარტებით, ეს ყველაფერი იმისთვის ხდებოდა, რადგან მათ ეშინიათ 2024 წლის საპარლამენტო არჩევნების.

 

„ეს ყველაფერი მომწიფდა მიუხედავად გავეშებული ბრძოლისა, რომელსაც ქართველი ქართველის წინააღმდეგ აწარმოებს ამ ქვეყანაში და ეს არახალია, ძველია. ჩვენი ციხე სამწუხაროდ ყოველთვის შიგნიდან ტყდებოდა. რამდენიმე ჩემი კოლეგის, ყოფილი თუ მოქმედი პოლიტიკოსის გაფრთხილებაც მოვისმინე, რომ აი, ჩვენ 2008-ში ერთთვიანი მორატორიუმი გამოვაცხადეთ და ხელისუფლებას აღარ ვუპირისპირდებოდით. მეც იქ ვიყავი და მახსოვს, ლევან გაჩეჩილაძის ინიციატივა იყო მაშინ, მაგრამ იგივე გააკეთა „ნაციონალურმა მოძრაობამ“, ან ქალბატონმა სამადაშვილმა, ან „ლელომ“, ან ვინმემ? -არა. ყოველი მათი ვიზიტი ემსახურებოდა მხოლოდ ერთ რამეს, რომ როგორმე სტატუსი არ მიგვეღო.

 

იცით რატომ ხდებოდა ეს ყველაფერი? -მათ ეშინიათ 2024 წლის არჩევნების და უნდა ეშინოდეთ. რომ ვერ შეგვაფერხეს ევროპისკენ მიმავალ გზაზე და პირველ რიგში, ვერ შეაფერხეს ეს ქვეყანა, გადაწყვიტეს, რომ დარტყმა მიაყენონ ელექტრონული წესით ჩასატარებელ არჩევნებს. ნახეთ, რა უბედურება ტრიალებს მათ თავს, თურმე „ქართულმა ოცნებამ“ ამერიკული და კანადური კომპანია იმიტომ შემოიყვანა საქართველოში, რომ ოპოზიციას გაუყალბოს არჩევნები. ანუ, ერთ შემთხვევაში, შეერთებული შტატები, იქაური ნოვაცია, იქაური საარჩევნო კულტურა მათთვის მისაღებია, როგორც კი ამ კულტურას აქ დავნერგავთ და ვიტყვით, რომ ეს არის მოქმედების წესი, არა კაცო, ეს პუტინმა დანერგა. ჩვენ მოგვაქვს საერთაშორისო სტანდარტი, რომ ერთხელ და სამუდამოდ დამთავრდეს თავპირის ლეწვა საქართველოში საუბნო საარჩევნო კომისიების ირგვლივ ღამის საათებში და არ იყოს სრული განუკითხაობა, ამიტომ გვინდა ეს დავასრულოთ.

 

საქართველოს ახლა ჰაერივით სჭირდება ევროკავშირი. ფეთქებად საშიშ რეგიონში, გაიხედეთ ჩრდილოეთით, სამხრეთით რა ხდება. აქედან 500 კილომეტრში უამრავი ადამიანი იხოცება, ჩრდილოეთში 500 კილომეტრში უამრავი ადამიანი იხოცება, ჩვენ რა უნდა გავაკეთოთ ამ შემთხვევაში? 1988 წლიდან ქუჩაში ვდგავარ საქართველოს დროშით და ახლა ესენი (რადიკალურ ოპოზიცია) მასწავლიან მე სამშობლოს სიყვარულს. ეს არის ყველაზე დიდი უბედურება, ის ხალხი მასწავლის სამშობლოს სიყვარულს, რომელიც სამხრეთ ოსეთის ოლქის აღდგენაზე ხმას აძლევდა. ზუსტად ის ხალხი დღეს გამოდის და ნოტაციას მიკითხავს, ზოგი გაექსპერტდა, ზოგიერთი სააკაშვილის მემორიალური ოთახის რიგში დგას მისი ბოტასების ხილვა უნდათ და ზოგიერთი პირდაპირ „ნაციონალური მოძრაობის“ წევრი გახდა. მე არც ერთი ვარ, არც მეორე, არც მესამე და არც ვიქნები“-განაცხადა გია ცაგარეიშვილმა.