თამთა მეგრელიშვილი შსს-ს განცხადებაზე: კანონი ყველასთვის ერთი დავალებაა, ის უნდა იყოს დაცული - ახალგაზრდებო, თქვენს ბრძოლაში ევროპული შინაარსი დაკარგულია და სხვათა მიერ დაგეგმილ ანტიქართულ გეგმას მიჰყვებით

9-05-2024

„ხალხის ძალის” წევრი, თამთა მეგრელიშვილი, საპროტესტო აქციებზე განხორციელებულ ძალადობრივ ქმედებებთან დაკავშირებით შსს-ს მიერ გავრცელებულ ინფორმაციას სოციალურ ქსელში ეხმიანება და აღნიშნავს, რომ კანონი ყველასთვის ერთნაირად უნდა იყოს დაცული.

მისი განცხადებით, ბრძოლაში, რომელიც მიმდინარეობს, ევროპული აღარაფერია და ახალგაზრდები ანტიქართული გეგმის შესასრულებლად გამოიყენებიან, შესაბამისად, ისინი უნდა დაფიქრდნენ, უღირთ თუ არა არასამთავრობო სექტორში დასაქმებულების ხელფასების დასაცავად ბრძოლა.

„უცხოური გავლენების გამჭვირვალობის შესახებ" კანონპროექტის მოწინააღმდეგეთა აქციაზე 15 აპრილიდან დღემდე, მოქალაქეების მხრიდან განხორციელებულ ძალადობრივ ქმედებებთან დაკავშირებით, ცენტრალური კრიმინალური პოლიციის დეპარტამენტში გამოძიება სისხლის სამართლის კოდექსის სამი მუხლითაა დაწყებული - სისხლის სამართლის კოდექსის 222-ე მუხლით, რაც გულისხმობს სტრატეგიული ან განსაკუთრებული მნიშვნელობის ობიექტის ხელში ჩაგდებას ან ბლოკირებას.

ასევე, სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს და ამავე კოდექსის 226-ე მუხლით, რაც გულისხმობს ჯგუფური მოქმედების ორგანიზებას, რომელიც უხეშად არღვევს საზოგადოებრივ წესრიგს ან დაკავშირებულია ხელისუფლების წარმომადგენლის კანონიერი მოთხოვნისადმი აშკარა დაუმორჩილებლობასთან, ან რომელმაც ტრანსპორტის, დაწესებულების ან ორგანიზაციის მუშაობის შეფერხება გამოიწვია.

გამოძიების ფარგლებში, სამართალდამცველების მხრიდან, საგამოძიებო ორგანოში მოხდება აქციის ორგანიზატორების, პოლიტიკური ლიდერებისა და ყველა იმ პირის გამოკითხვა, რომლებსაც შესაძლოა რაიმე სახის კავშირი ჰქონდეს აღნიშნულ სისხლის სამართლის საქმესთან.” კანონი ყველასთვის ერთი დავალებაა, ის უნდა იყოს დაცული! ახალგაზრდებო, რომლებიც აქციაზე უშინაარსოდ დგახართ დაფიქრდით, გიღირთ კი არასამთავრობო სექტორში სხვათა ხელფასების დასაცავად ბრძოლა?! თქვენს ბრძოლაში ევროპული შინაარსი დაკარგულია, ევროპული არაფერია. თქვენ სხვათა მიერ საგანგებოდ დაგეგმილ ანტიქართულ გეგმას მიჰყვებით“, - წერს მეგრელიშვილი.