მიხეილ ყაველაშვილი დასავლელ პარტნიორებზე: ისინი ცდილობენ იმოქმედონ საზოგადოების ნაწილზე, რომ დააზარალონ ხელისუფლება და როგორმე მოხდეს ძალადობრივი ქმედებები, ახლა ალბათ დაელოდებიან არჩევნებს - იქნებ მაშინ გამოვიდეს ეს ამბავი

17-06-2024

პარტია „ხალხის ძალის“ პოლიტიკური მდივანი მიხეილ ყაველაშვილი დასავლელი პარტნიორების განცხადებებსა და ქმედებებს აფასებს.

დეპუტატის თქმით, „ხალხის ძალის“ წევრები იყვნენ პირველები, ვინც აშშ-ის მაშინდელ ელჩს დასავლეთის ორმაგ სტანდარტთან დაკავშირებით მიმართა.

მიხეილ ყაველაშვილი ამბობს, რომ დასავლელი პარტნიორები ქვეყანაში არეულობის მსურველების ზურგს უკან არიან ამოფარებული, ეს კი არც მეგობრობაა და არც პარტნიორობა. ყაველაშვილის თქმით, უცხოელი პარტნიორები ცდილობენ საზოგადოების ნაწილზე იმოქმედონ და მათი საშუალებით ქვეყანაში რევოლუცია მოაწყონ. დეპუტატი ვარაუდობს, რომ ქვეყანაში არეულობის მოსაწყობად არჩევნებს ელოდებიან.

„ხალხის ძალა“ იყო პირველი, ვინც გავბედეთ და მივმართეთ აშშ-ის მაშინდელ ელჩს, რომ ორმაგი სტანდარტი და ასეთი მიდგომა მიუღებელია, არ არის სწორი არც პარტნიორული და არც მეგობრული თვალსაზრისით. ამიტომ ვთხოვეთ, ნუ გააკეთებენ ისეთ საქმეს და ნუ მიიღებენ გადაწყვეტილებას, რაც ავნებს ჩვენს ურთიერთობას. მაშინ პირდაპირ ვუთხარით და ახლაც ვუმეორებთ - ნუ ხართ იმ ძალების ზურგს უკან ამოფარებული, რომლებიც ცდილობენ ამ ქვეყანაში ძალადობრივი გზით მოიპოვოთ ხელისუფლება, ამას ჩვენ არ დავუშვებთ. სიმშვიდის და ჩვენი პოზიციის სიმყარის გარანტია ჩვენთვის არის საზოგადოება, ქართველი ხალხის უმრავლესობა, რომელიც მყარად დაუდგა ჩვენს ხელისუფლებას ამ სიტუაციაში და ამას ვერავინ ვერ შეეწინააღმდეგება. ამ ხალხის რაოდენობა უფრო მეტად გაიზრდება. ისინი ცდილობენ იმოქმედონ საზოგადოების ნაწილზე, რომ დააზარალონ ხელისუფლება, როგორმე მოხდეს ძალადობრივი ქმედებები, რასაც გამჭვირვალობის კანონთან მიმართებაში ადგილი ჰქონდა. ახლა ალბათ დაელოდებიან არჩევნებს - იქნებ მაშინ გამოვიდეს ეს ამბავი,“- აღნიშნა ყაველაშვილმა.