აფხაზეთის დე ფაქტო პარლამენტის თავმჯდომარე ჰოსპიტალიზებულია

10-01-2020

ოკუპირებული აფხაზეთის დე ფაქტო პარლამენტის თავმჯდომარე ჰოსპიტალიზებულია.

ვალერი კვარჩია საავადმყოფოში გულის შეტევით გადაიყვანეს. ინფორმაციას რუსული მედია ავრცელებს.

ე.წ. პარლამენტის პრესსამსახურის ინფორმაციით, კვარჩიამ „პარლამენტის“ შენობა თავისი ფეხით ექიმებთან ერთად დატოვა. ადგილზე შეკრებილებს კი კეთილგონიერებისკენ მოუწოდა.

ოკუპირებულ აფხაზეთში არეულობა გრძელდება. მოსახლეობა რაულ ხაჯიბას მეორე ვადით „პრეზიდენტად“ არჩევას აპროტესტებს.

გუშინ ოპოზიციური პარტია „ამცახარას“ მხარდამჭერები დე ფაქტო პრეზიდენტის ადმინისტრაციაში შეიჭრნენ.

სოხუმში მიმდინარე მოვლენებს, თბილისში შერიგებისა და სამოქალაქო თანასწორობის საკითხებში სახელმწიფო მინისტრი გამოეხმაურა.