სამართლიანად ჩატარდა თუ არა არჩევნები
გიორგი გახარია: სიტუაცია რთულია, თუმცა ყველაფერი მართვადია
26-11-2020
სიტუაცია რთულია, თუმცა ეს ყველაფერი არის მართვადი და ჩვენ, ისევე, როგორც აგვისტომდე, ყველანი ერთად, ჩვენს მოქალაქეებთან, ექიმებთან, პოლიციასთან ერთად ვახერხებდით, ფაქტობრივად, საუკეთესოდ ბალანსის დაჭერას ეკონომიკის ინტერესებსა და ადამიანის ჯანმრთელობას შორის, ჩვენ ამ მაჩვენებლებს უნდა დავუბრუნდეთ, - ამის შესახებ საქართველოს პრემიერ-მინისტრმა გიორგი გახარიამ, უწყებათაშორისი საკორდინაციო საბჭოს სხდომის დასრულების შემდეგ, მთავრობის ადმინისტრაციაში გამართულ ბრიფინგზე განაცხადა.
გიორგი გახარიას განმარტებით, მთავრობის არჩევანი ყოველთვის იყო ეპიდემიის მართვაში, ეკონომიკასთან ერთად, ბალანსის დაჭერა, რაც შემდგომ გადაიზარდა ადაპტაციაში და ეს პოლიტიკა და სტრატეგია გაგრძელდება ეფექტურად.
„დღეს გვქონდა საკოორდინაციო საბჭოს შეხვედრა, რომელზეც განხილული იყო მიმდინარე, როგორც ეპიდემიოლოგიური, ასევე ეკონომიკური მდგომარეობა ქვეყანაში. ჩვენ, დაახლოებით ერთ კვირაზე მეტია უკვე ვმუშაობთ გარკვეულ ღონისძიებებზე, რომელზეც დღეს მინდა, რომ ვისაუბროთ, თუმცა სანამ კონკრეტულ ღონისძიებებზე გადავალთ, უნდა ვთქვათ, რომ სიტუაცია, რა თქმა უნდა, არ არის მარტივი. სიტუაცია რთულია, თუმცა ეს ყველაფერი არის მართვადი და ჩვენ, ისევე, როგორც აგვისტომდე, ყველანი ერთად, ჩვენს მოქალაქეებთან, ექიმებთან, პოლიციასთან ერთად ვახერხებდით, ფაქტობრივად, საუკეთესოდ ბალანსის დაჭერას ეკონომიკის ინტერესებსა და ადამიანის ჯანმრთელობას შორის, ჩვენ ამ მაჩვენებლებს უნდა დავუბრუნდეთ.
მოგეხსენებათ, რომ მსოფლიოში არის ეპიდემიის რეკორდული ზრდა, განსაკუთრებით ეს ყველაფერი კონცენტრირებულია ევროპაში. ყველას კარგად უნდა გვესმოდეს, რომ როდესაც მე ვსაუბრობ ბალანსზე, ეპიდემიის მართვაში ჩვენი არჩევანი ყოველთვის იყო, ეკონომიკასთან ერთად, ბალანსის დაჭერა, რაც შემდგომ გადაიზარდა ადაპტაციაში და ჩვენ ამ პოლიტიკას და სტრატეგიას გავაგრძელებთ ეფექტურად“, - განაცხადა გიორგი გახარიამ.
