სამართლიანად ჩატარდა თუ არა არჩევნები
ნიუ-იორკში საქართველოს თავმჯდომარეობით, სუამ-ის საგარეო საქმეთა მინისტრების საბჭოს სხდომა გაიმართა
23-09-2021
ნიუ-იორკში, გაერო-ს გენერალური ასამბლეის 76-ე სესიის მაღალი დონის კვირეულის ფარგლებში, დემოკრატიისა და ეკონომიკური განვითარების ორგანიზაცია - სუამ-ის საქართველოს თავმჯდომარეობით, საგარეო საქმეთა მინისტრების საბჭოს ტრადიციული სხდომა გაიმართა.
სხდომას თავმჯდომარეობდა საქართველოს ვიცე-პრემიერი, საგარეო საქმეთა მინისტრი, დავით ზალკალიანი და მასში მონაწილეობა მიიღეს აზერბაიჯანის რესპუბლიკის საგარეო საქმეთა მინისტრმა, ჯეიჰუნ ბაირამოვმა, მოლდოვას რესპუბლიკის საგარეო საქმეთა და ევროპული ინტეგრაციის მინისტრმა, ნიკუ პოპესკუმ, უკრაინის საგარეო საქმეთა მინისტრმა, დმიტრო კულებამ და სუამ-ის გენერალურმა მდივანმა, ალთაი ეფენდიევმა.
მინისტერიალზე მხარეებმა განიხილეს ორგანიზაციის დღის წესრიგში არსებული თანამშრომლობის ძირითადი საკითხები, მათ შორის პოლიტიკური, სექტორალური და საპარლამენტთაშორისო მიმართულებით.
პოლიტიკური ურთიერთქმედების კონტექსტში, დავით ზალკალიანმა სხდომის მონაწილეებს დეტალური ინფორმაცია მიაწოდა საქართველოს ოკუპირებულ რეგიონებში უსაფრთხოების, ჰუმანიტარულ და ადამიანის უფლებების კუთხით არსებულ რთულ ვითარებასა და საოკუპაციო ძალის პროვოკაციულ ქმედებებზე. მინისტრმა ხაზი გაუსვა იმ გარემოებას, რომ რუსეთი არ ასრულებს 2008 წლის ცეცხლის შეწყვეტის შეთანხმების დებულებებს და ამ კონტექსტში ხაზი გაუსვა საერთაშორისო თანამეგობრობის კონსოლიდირებული ჩართულობის მნიშვნელობას.
მინისტრმა ასევე ისაუბრა საქართველოში 2021 წლის 2 ოქტომბერს დაგეგმილ ადგილობრივი თვითმმართველობის არჩევნებსა და მასთან დაკავშირებულ საკითხებზე.
მინისტერიალზე მხარეებმა ასევე ისაუბრეს და დადებითად შეაფასეს სუამ+ ფორმატის ფარგლებში თანამშრომლობა ორგანიზაციის პარტნიორ ქვეყნებთან და სხვა საერთაშორისო, მათ შორის რეგიონულ ორგანიზაციებთან. ამასთან, მიმოიხილეს თანამშრომლობის პერსპექტივები სხვა ქვეყნებთან და ორგანიზაციებთან, რაც მიმდინარე წელს, სუამ-ში საქართველოს თავმჯდომარეობის ერთ-ერთ მთავარ პრიორიტეტს წარმოადგენს.
შეხვედრაზე მინისტრებმა მიიღეს გადაწყვეტილება სუამ-ის სტრატეგიული კომუნიკაციების სამუშაო ჯგუფის დაფუძნების თაობაზე, რომელიც ქართული მხარის ინიციატივას წარმოადგენს.
შეხვედრის ბოლოს, მხარეებმა ხელი მოაწერეს სხდომის ოქმს და გადაწყვეტილებებს საორგანიზაციო საკითხების შესახებ.
