როგორც „პირველს“ სახელმწიფო უსაფრთხოების სამსახურიდან აცნობეს, ამჯერად, ოკუპირებულ ტერიტორიის სიღრმეში უკანონო ინსტალაციების რელოკაცია დაფიქსირდა.
“2017 წელს ზუგდიდის მუნიციპალიტეტის სოფელი ხურჩის მიმდებარედ, საოკუპაციო ხაზზე ბორდერიზაციის უკანონო პროცესის რამდენიმე ეპიზოდი დაფიქსირდა.
კერძოდ, საოკუპაციო ძალების წარმომადგენლებმა გასული წლის აპრილის მიწურულს პირველად მოახდინეს ზემოაღნიშნულ ლოკაციაზე ბოძებისა და მავთულხლართების ინსტალაცია.
ანალოგიურ უკანონო ქმედებებს ასევე ადგილი ჰქონდა მაისის, აგვისტოს და დეკემბრის პერიოდშიც.
მიმდინარე წლის იანვარში კი დაფიქსირდა ზემოხსენებული უკანონო ინსტალაციების რელოკაცია ოკუპირებულ ტერიტორიაზე 100-150 მ. სიღრმეში. საოკუპაციო ძალების მიერ განხორციელებული ე.წ. ბორდერიზაციის ზემოხსენებული ფაქტები უკანონო ქმედებებია”, - ნათქვამია უწყების განცხადებაში.
