აშშ-ის იუსტიციის დეპარტამენტმა გამოაქვეყნა დოკუმენტი, რომლის მიხედვითაც, ნაცმოძრაობამ აშშ-ში ლობისტური კომპანია 360 ათას დოლარად დაიქირავა

18-09-2025

აშშ-ის იუსტიციის დეპარტამენტში რეგისტრირებული ახალი დოკუმენტის მიხედვით, „ერთიანმა ნაციონალურმა მოძრაობამ“ აშშ-ში ლობისტურ კომპანიასთან კონტრაქტს მოაწერა ხელი.

„ერთიანმა ნაციონალურმა მოძრაობამ“, Nelson Mullins Riley & Scarborough LLP-თან 7 ივლისს დადებული ხელშეკრულებით, 360 ათასი დოლარი გადაიხადა ექვსი თვის მომსახურებისთვის. ეს თანხა მოიცავს ყველა ხარჯს, გარდა მგზავრობის ხარჯებისა, რომელიც წინასწარ უნდა იყოს შეთანხმებული.

დოკუმენტის მიხედვით, დაქირავებული კომპანიის ვალდებულებაა აშშ-ის მთავრობის წინაშე პარტიის ინტერესების დაცვა, მათ შორის დემოკრატიული პროცესებისა და საქართველოში თავისუფალი არჩევნების ხელშეწყობა.

დოკუმენტის თანახმად, კომპანია გეგმავს პარტიის დიპლომატიური საქმიანობის მხარდაჭერას და აშშ-ის ხელისუფლებასთან ურთიერთობების გაღრმავებას.

კონტრაქტის პირობებით, მომსახურება მოიცავს მთავრობის წინაშე ადვოკატირებას, ურთიერთობების სტრატეგიის შემუშავებას და დემოკრატიული პროცესების შესახებ ცნობიერების ამაღლებას. ხელშეკრულება ასევე ითვალისწინებს სავალდებულო რეგისტრაციას FARA-ს (Foreign Agents Registration Act) ფარგლებში, რაც ნიშნავს, რომ კომპანია აშშ-ის კანონმდებლობის ფარგლებში იმოქმედებს და ყველა ინფორმაცია საჯაროდ იქნება ხელმისაწვდომი.

დოკუმენტის მიხედვით, „ერთიანი ნაციონალური მოძრაობის“ ხელშეკრულებას პეტრე ცისკარიშვილმა მოაწერა სახელით.