სამართლიანად ჩატარდა თუ არა არჩევნები
ქალაქ მადრიდში გამართულ სოფლის მეურნეობის საერთაშორისო გამოფენაში Fruit Attraction 2025 ქართული ნაციონალური პავილიონი პირველად იყო წარმოდგენილი
8-10-2025
გარემოს დაცვისა და სოფლის მეურნეობის სამინისტროს მხარდაჭერითა და სოფლის განვითარების სააგენტოს ორგანიზებით, ესპანეთის სამეფოში, ქ. მადრიდში გამართულ საერთაშორისო გამოფენაზე Fruit Attraction 2025 ქართული ნაციონალური პავილიონი პირველად მოეწყო.
ქართულ პავილიონში წარმოდგენილი იყო ლურჯი მოცვის, თხილისა და სანელებლების მწარმოებელი კომპანიების: ,,ბლუ ბერდ ბერიზ”, „გოლდენ ფარმს”, ,,S.R.T”, ,,აგროლეინი”, ,,აგრო ველი”, ,,ჯენტრი ინვესტმენტს”, ,,ალფაინ სფაისიზ”, ,,აგრითაჩი”, ,,ხონის პლანტაციები” სტენდები.
გამოფენის ფარგლებში ,სოფლის განვითარების სააგენტოს დირექტორის მოადგილის მოვალეობის შემსრულებელი ნიკა ურუშაძე, ლურჯი მოცვის მწარმოებელთა ასოციაციის დირექტორ შოთა ცუკოშვილთან და ქართულ პავილიონში წარმოდგენილ ლურჯი მოცვის მწარმოებლებთან ერთად, მოცვის საერთაშორისო ორგანიზაციის თავმჯდომარეს მარიო სტეტას შეხვდა.
შეხვედრაზე ქართული მოცვის სექტორის შესაძლებლობებზე იმსჯელეს. მოცვის საერთაშორისო ორგანიზაციის თავმჯდომარე მარიო სტეტამ აღნიშნა, რომ საქართველოს აქვს უნიკალური პოტენციალი გახდეს ერთ-ერთი მნიშვნელოვანი მოთამაშე ევროპისა და აზიის შორის მოცვის მიწოდების ჯაჭვში.
ესპანეთის სამეფოში საქართველოს საგანგებო და სრულუფლებიანი ელჩის ალექსანდრე ჭკუასელის განცხადებით, საქართველოს საელჩო აქტიურად უწყობს ხელს ქართულ კომპანიებს საერთაშორისო გამოფენებში მონაწილეობას, რათა გაიზარდოს ქართული პროდუქციის მიმართ ცნობადობა.
საერთაშორისო გამოფენაში Fruit Attraction მსოფლიოს 150 ქვეყნიდან 2,200-ზე მეტმა კომპანიამ მიიღო მონაწილეობა. გამოფენას 120 ათასზე მეტი ვიზიტორი სტუმრობდა.
