პოლიციამ ნარკოდანაშაულის ბრალდებით ერთი პირი დააკავა

18-10-2025

შინაგან საქმეთა სამინისტროს თბილისის პოლიციის დეპარტამენტის ისანი-სამგორის მთავარი სამმართველოს თანამშრომლებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დიდი ოდენობით ნარკოტიკული საშუალების უკანონო შეძენა-შენახვისა და განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანა-კულტივირების ბრალდებით 1991 წელს დაბადებული დ.მ. დააკავეს. ინფორმაციას შსს ავრცელებს. 

უწყების ცნობით, დანაშაულები 12 წლამდე ვადით თავისუფლების აღკვეთას ითვალისწინებს.

„სამართალდამცველებმა ნარკოდანაშაულის ბრალდებით დაკავებული დ.მ.-ს საცხოვრებელ ბინაში სპეციალურად მოწყობილი სათბურიდან, ნარკოტიკული ნივთიერების შემცველი 14 მცენარე „კანაფი“ და 3 თუნუქის ქილაში მოთავსებული „გამომშრალი მარიხუანა“ ნივთმტკიცებად ამოიღეს.

ასევე, ამოღებულია ნარკოტიკული საშუალებების დაფასოებისთვის საჭირო მასალები, ელექტრო მოწყობილობები, 25 150 ლარი, 670 აშშ დოლარი და 120 ევრო.

გამოძიება სისხლის სამართლის კოდექსის 260-ე და 265-ე პრიმა მუხლებით მიმდინარეობს“, - აღნიშნულია ინფორმაციაში.