სამართლიანად ჩატარდა თუ არა არჩევნები
მარიამ ქვრივიშვილი: ჩვენი მოლოდინები თბილისის აბრეშუმის გზის ფორუმის დასრულების შემდეგ ძალიან პოზიტიურია
27-10-2025
ეკონომიკისა და მდგრადი განვითარების მინისტრმა მარიამ ქვრივიშვილმა თბილისის აბრეშუმის გზის ფორუმი შეაფასა. მინისტრის თქმით, ფორუმზე თითოეულ ქვეყანას, განსაკუთრებით კი საქართველოს, ჰქონდათ შესაძლებლობა, კიდევ უფრო დეტალურად ესაუბრათ იმ მიღწევებზე, შედეგებსა და გეგმებზე, რომლებიც უშუალოდ ტრანსპორტის, ლოგისტიკის და ინვესტიციების მიმართულებით გააჩნიათ.
„ჩვენ, რა თქმა უნდა, გამოვიყენეთ ეს შესაძლებლობა და ბევრი ვისაუბრეთ იმ მიღწევებზე, რომლებიც ჩვენს ქვეყანას აქვს უშუალოდ ეკონომიკის განვითარების კუთხით, ასევე მიმდინარე და დაგეგმილ მსხვილ ინფრასტრუქტურულ პროექტებზე. ისინი მნიშვნელოვანია ჩვენი ქვეყნის პოზიციონირებისთვის როგორც უშუალოდ შუა დერეფანში, ასევე ტრანზიტული ლოგისტიკური ჰაბის ფუნქციის გაძლიერებისთვის," - აღნიშნა მინისტრმა.
თბილისის აბრეშუმის გზის ფორუმი 2025 წლის 22-23 ოქტომბერს საქართველოს პრემიერ-მინისტრის პატრონაჟით გაიმართა და მასში 70-ზე მეტი ქვეყნის 2300-ზე მეტმა დელეგატმა მიიღო მონაწილეობა.
როგორც მინისტრმა აღნიშნა, მოლოდინები ფორუმის დასრულების შემდეგ ძალიან პოზიტიურია, რომ საქართველოს ექნება არაერთი ხელშესახები შედეგი, რადგან ფორუმის ფარგლებში უმნიშვნელოვანესი შეხვედრები გაიმართა.
„ფორუმზე გამართული შეხვედრების ფარგლებში ჩვენ ვისაუბრეთ კონკრეტულ პროექტებზე, მათი შესრულების გეგმებსა და ვადებზე, რაც, რა თქმა უნდა, აისახება ასევე კონკრეტულ შედეგებში. აღნიშნული პროექტები უზრუნველყოფს საქართველოს ეკონომიკის, მისი როლისა და ფუნქციის გაძლიერებას შუა დერეფანში და მისი პოზიციონირების კიდევ უფრო მეტად გამყარებას, როგორც ტრანზიტული - ლოგისტიკური ჰაბის," - აღნიშნა მარიამ ქვრივიშვილმა.
