დავით სონღულაშვილი: ჩინეთის საერთაშორისო იმპორტის გამოფენაში მონაწილეობა დამატებითი შესაძლებლობაა, ქართული პროდუქცია კიდევ უფრო მეტად ცნობადი გახდეს ჩინეთის უმსხვილეს ბაზარზე

5-11-2025

საქართველოს გარემოს დაცვისა და სოფლის მეურნეობის მინისტრი დავით სონღულაშვილი, ჩინეთის სახალხო რესპუბლიკაში ოფიციალური ვიზიტის ფარგლებში, ჩინეთის საერთაშორისო იმპორტის  გამოფენის გახსნის ცერემონიას დაესწრო.

„ჩინეთში, საერთაშორისო იმპორტის გამოფენაზე საქართველო საპატიო სტუმრის სტატუსით არის წარმოდგენილი. ჩინეთის ბაზარს ჩვენთვის სტრატეგიული მნიშვნელობა აქვს. უმსხვილეს გამოფენაში მონაწილეობა შესაძლებლობაა იმისთვის, რომ ჩინეთის ბაზარზე კიდევ უფრო მეტი წვდომა გაგვიჩნდეს. წელს გამოფენაზე წარმოდგენილია 40-ზე მეტი ქართული კომპანია. გამოფენის გახსნამდე, საქართველოს და ჩინეთს შორის გაფორმდა არაერთი მემორანდუმი და ხელშეკრულება. ერთობლიობაში, იქმნება ყველა პირობა, ორ ქვეყანას შორის თანამშრომლობის გასაღრმავებლად, იქმნება შესაძლებლობები, ქართული კომპანიები და პროდუქცია მეტად ცნობადი გახდეს ჩინეთის ბაზარზე, რაც, თავისთავად, ხელს შეუწყობს საქართველოდან ექსპორტის ზრდას და ეკონომიკის განვითარებას“, - განაცხადა დავით სონღულაშვილმა.

აღსანიშნავია, რომ ჩინეთის სახალხო რესპუბლიკაში ვიზიტის ფარგლებში, დავით სონღულაშვილმა ხელი მოაწერა ორ ქვეყანას შორის თანამშრომლობის მემორანდუმებს, რომლებიც სოფლის მეურნეობისა და გარემოს დაცვის მიმართულებებს მოიცავს.

საქართველოს სამთავრობო დელეგაცია, პრემიერ-მინისტრ ირაკლი კობახიძის ხელმძღვანელობით, ჩინეთის სახალხო რესპუბლიკაში, პრემიერის ლი ციანის მიწვევით იმყოფება.