სამართლიანად ჩატარდა თუ არა არჩევნები
გარემოს დაცვისა და სოფლის მეურნეობის სამინისტროში ცხოველური წარმოშობის არასასურსათო დანიშნულების პროდუქტების მართვის საკითხები განიხილეს
22-01-2026
გარემოს დაცვისა და სოფლის მეურნეობის მინისტრის მოადგილეებმა სოლომონ პავლიაშვილმა და ლაშა დოლიძემ კერძო სექტორის წარმომადგენლებთან ცხოველური წარმოშობის არასასურსათო დანიშნულების პროდუქტების მართვის საკითხები განიხილეს.
„ცხოველური ნარჩენების მართვა საქართველოში მნიშვნელოვანი გამოწვევაა. სასაკლაოებში, ბაზრებსა და ფერმებში წარმოქმნილი ცხოველური ნარჩენების სწორი მართვა კრიტიკულია როგორც საზოგადოებრივი ჯანმრთელობის, ისე გარემოს დაცვისა და ეკონომიკური მდგრადობის თვალსაზრისით. ჩვენი ამოცანაა, ბიზნესსექტორთან კოორდინირებული თანამშრომლობით, უზრუნველვყოთ ეფექტიანი სისტემის ფუნქციონირება“, - განაცხადა სოლომონ პავლიაშვილმა.
როგორც შეხვედრაზე ლაშა დოლიძემ აღნიშნა, სახელმწიფო ბიზნესსექტორს სხვადასხვა მხარდამჭერ პროგრამებს შესთავაზებს.
„ამჟამად, სოფლის განვითარების სააგენტოში მიმდინარეობს პროგრამული რეორგანიზაციის პროცესი. ჩვენი მიზანია, ბიზნესსექტორის საჭიროებებისა და პრიორიტეტების გათვალისწინებით გადაიხედოს ან შეიქმნას ახალი მხარდამჭერი პროგრამები“, - განაცხადა ლაშა დოლიძემ.
საუბარი შეეხო ვადების დაცვის საკითხს. აღინიშნა, რომ სამუშაო ფორმატის შეხვედრები მომავალშიც გაგრძელდება.
შეხვედრას სურსათის ეროვნული სააგენტოს, გარემოს ეროვნული სააგენტოს, მყარი ნარჩენების მართვის კომპანიის, გარემოსდაცვითი ზედამხედველობის დეპარტამენტის და ნარჩენებისა და ქიმიური ნივთიერებების მართვის პოლიტიკის დეპარტამენტის ხელმძღვანელი პირები ესწრებოდნენ.
