თამარ იოსელიანმა აშშ - ის ელჩის მოვალეობის შემსრულებელს საქართველოს სატრანსპორტო სექტორში მიმდინარე პროექტები გააცნო

12-02-2026

ეკონომიკისა და მდგრადი განვითარების მინისტრის მოადგილე თამარ იოსელიანი, სს „საქართველოს რკინიგზის" გენერალურ დირექტორ ლაშა აბაშიძესთან ერთად, აშშ - ის ელჩის მოვალეობის შემსრულებელს საქართველოში ალან პერსელს და სარკინიგზო ტრანსპორტის ამერიკული მანქანათმშენებელი კორპორაციის Wabtec - ის წარმომადგენლებს შეხვდა.

შეხვედრაზე მინისტრის მოადგილემ ვრცლად ისაუბრა საქართველოს ტრანსპორტისა და ლოგისტიკის სექტორში მიმდინარე პროცესებზე, არსებულ და დაგეგმილ მსხვილ პროექტებზე, რომელთა განხორციელებაც მნიშვნელოვნად გაზრდის საქართველოს, როგორც სატრანზიტო მოთამაშის, როლს შუა დერეფანში.

ერთ - ერთ ასეთ პროექტად დასახელდა საქართველოს რკინიგზის მოდერნიზაცია. აღინიშნა, რომ საქართველო მიმდინარე წელს 1 მლრდ ლარის დახარჯვას გეგმავს „საქართველოს რკინიგზის" სავაგონე და სალოკომოტივო პარკის განახლებისთვის. როგორც მინისტრის მოადგილემ თქვა, ქვეყნის სატრანზიტო ფუნქციის განვითარება საქართველოს მთავრობის პრიორიტეტული მიმართულებაა, რაშიც საქართველოს რკინიგზის გამართულ და უსაფრთხო ფუნქციონირებას უდიდესი წვლილი ენიჭება.

შეხვედრაზე კომპანია Wabtec - ის წარმომადგენლებმა ინტერესი გამოხატეს საქართველოს რკინიგზის მიერ სალოკომოტივო პარკის განახლების პროექტთან დაკავშირებით. მხარეები შეთანხმდნენ, რომ რკინიგზა ამერიკულ კომპანიას მიაწვდის დეტალურ ინფორმაცია მომავალი შესყიდვის შესახებ.

შეხვედრაზე ასევე საუბარი შეეხო ისეთ მსხვილ ინფრასტრუქტურულ პროექტებს, როგორიცაა ანაკლიის ღრმაწყლოვანი ნავსადგური, აღმოსავლეთ - დასავლეთის მაგისტრალი, თბილისის ახალი აეროპორტი და სხვ.