მარიამ ქვრივიშვილმა ბიზნეს ფორუმზე განსაკუთრებული ყურადღება თბილისის ახალი საერთაშორისო აეროპორტის პროექტზე გააკეთა

26-02-2026

„ჩვენ მნიშვნელოვანი ინვესტიციები განვახორციელეთ საჰაერო დაკავშირებადობის თვალსაზრისით და ვამაყობთ იმით, რასაც მივაღწიეთ B2B და სამთავრობო დონეზე. 2025 წელს ყველა იმ მიღწევამ, რომელიც ავიაციასა და სატრანსპორტო სექტორში გვაქვს, ყველა რეკორდი მოხსნა - ჩვენმა სამმა საერთაშორისო აეროპორტმა მართლაც რეკორდული რაოდენობის, 8.5 მლნ მგზავრს უმასპინძლა. მიხარია, რომ ჩვენს ქვეყანაში საინვესტიციო გარემო ნამდვილად გაძლიერდა, რაც თავის მხრივ, აძლიერებს ამ კომპანიების მდგომარეობას, ისინი იზრდებიან საქართველოს ბაზარზე", - განაცხადა ეკონომიკისა და მდგრადი განვითარების მინისტრმა მარიამ ქვრივიშვილმა საქართველო - აზერბაიჯანი - თურქეთის ბიზნეს ფორუმზე გამოსვლისას.

მარიამ ქვრივიშვილმა ასევე აქცენტი გააკეთა სამოქალაქო ავიაციის სექტორის, კერძოდ, სააეროპორტო ინფრასტრუქტურის განვითარების მიზნით მიმდინარე პროექტებზე და განსაკუთრებული ყურადღება თბილისის ახალი საერთაშორისო აეროპორტის პროექტზე გააკეთა. ამასთან, მინისტრმა ხაზი გაუსვა კომპანია TAV-თან მრავალწლიან პარტნიორობას, რომლის ფარგლებში, სახელმწიფოსა და კომპანიას შორის ხელშეკრულება 2032 წლამდე გაგრძელდა და ოპერატორი 2027-2031 წლებში დაახლოებით 150 მილიონი აშშ დოლარის ინვესტიციას განახორციელებს.

საქართველო–აზერბაიჯანი–თურქეთის მეშვიდე ბიზნეს ფორუმი წინანდალში გაიმართა. ბიზნესფორუმის ორგანიზატორია საქართველოს ეკონომიკისა და მდგრადი განვითარების სამინისტრო და საქართველოს სავაჭრო-სამრეწველო პალატა, თანაორგანიზატორები კი Azpromo (აზერბაიჯანის ექსპორტისა და ინვესტიციების სააგენტო) და Deik (თურქეთის საგარეო ეკონომიკური ურთიერთობების საბჭო).