გერგეთამდე მისასვლელ გზაზე სტიქიით დაზიანებული მონაკვეთის აღსადგენად სამუშაოები დაიწყო

9-05-2019

ყაზბეგის მუნიციპალიტეტში, სტეფანწმინდა-სამების ეკლესიასთან მისასვლელი 5.6 კმ-იანი გზის 200 მეტრიან მონაკვეთზე სტიქიური მოვლენების გამო დაზიანდა გზის საფარი. პრობლემის დაფიქსირებისთანავე, გზების დეპარტამენტის მხრიდან მოხდა მყისიერი რეაგირება საგზაო უსაფრთხოების უზრუნველყოფის კუთხით და ავტოტრანსპორტის გადაადგილება დაზიანებულ მონაკვეთზე ცალმხრივად მიმდინარეობს. დეპარტამენტის ტექნიკურმა სამსახურებმა ოპერატიულად მოინახულეს ობიექტი და სტიქიური მოვლენებისაგან გამოწვეული პრობლემის მოსაგვარებლად შესაბამისი ღონისძიებები დასახეს - ინფორმაციას საავტომობილო გზების დეპარტამენტი ავრცელებს.

ამ დროისათვის, უკვე დაწყებულია პროექტირება სტიქიის ლიკვიდაციისა და პრევენციის კუხით. პარალელურ რეჟიმში დაიწყება დაზიანებული მონაკვეთის აღდგენის სამუშაოები. აღსანიშნავია, რომ დამატებითი სამუშაოები არ გამოიწვევს პროექტის ღირებულების გაძვირებას და ბიუჯეტიდან დამატებითი სახსრების გახარჯვას. დაზიანებული მონაკვეთის აღდგენა, პროექტის თავდაპირველი ღირებულებიდან ხარისხის უზრუნველსაყოფად განკუთვნილი და ამ მიზნით შემსრულებელი კომპანიისთვის დაკავებული 5%-ის ფარგლებში მოხდება. პრობლემის აღმოფხვრას წინასწარი შეფასებით 1,5-2 თვე დასჭირდება.

პროექტი სახელმწიფო ბიუჯეტიდან დაფინანსდა და მისი ღირებულება 7 793 854 ლარია. გზის სამშენებლო სამუშაოები შპს „სახელმწიფო სამშენებლო კომპანიამ“ განახორციელა.