საგანგებო სიტუაციების მართვის სამსახური: ყურადღება მიაქციეთ სანაპირო ზოლზე არსებულ საინფორმაციო ბანერებსა და ამკრძალავ ნიშნებს

14-06-2019

შინაგან საქმეთა სამინისტროს საგანგებო სიტუაციების მართვის სამსახური განცხადებას ავრცელებს.

საგანგებო სიტუაციების მართვის სამსახური საზოგადოებას მოუწოდებს, ზღვაზე, ტბებზე, მდინარეებსა და სხვა სანაპირო ზოლებზე, უბედური შემთხვევების თავიდან აცილების მიზნით, დაიცვან კონკრეტულ ადგილებში უსაფრთხოებისთვის დადგენილი წესები.

"ყურადღება მიაქციეთ სანაპირო ზოლზე არსებულ საინფორმაციო ბანერებსა და ამკრძალავ ნიშნებს. ასევე, არ გასცდეთ წყალში მონიშნულ საცურაო ტერიტორიას და მაშველთა პატრულირების არეალს; არ შეხვიდეთ წყალში არაფხიზელ მდგომარეობაში ან ნაბახუსევზე; დაუშვებელია ბავშვების და მოზარდების უყურადღებოდ დატოვება სანაპიროს ზოლსა და წყალში. კატეგორიულად აკრძალულია წყალში შესვლა შტორმის, უამინდობის და შეზღუდული ხილვადობის დროს.

თქვენივე უსაფრთხოდ განტვირთვისა და დასვენების მიზნით, თავი შეიკავეთ წყალში შესვლისგან იქ, სადაც არ არის მოწყობილი სანაპირო ზოლი, არ არის ხალხმრავალი ადგილი, არ დგას მიმანიშნებელი ან ამკრძალავი ნიშნები და არ არის შექმნილი უსაფრთხო ცურვისთვის შესაბამისი პირობები", - ნათქვამია საგანგებო სიტუაციების მართვის სამსახურის განცხადებაში.