სენაკის ჟიული შარტავას სახელობის მხარეთმცოდნეობის მუზეუმში სპორტის ოსტატებთან შეხვედრა გაიმართა

28-06-2019

სენაკში 92-წლოვან საცხენოსნო ისტორიას ჟიული შარტავას სახელობის მხარეთმცოდნეობის მუზეუმში სპორტის სენაკელ ოსტატებთან გამართული შეხვედრა და ფოტოგამოფენა ,,სენაკის საცხენოსნო ტრადიციები“ მიეძღვნა.

ღონისძიებას, რომელიც სენაკის საცხენოსნო კლუბის დამფუძნებლის ირაკლი ლაკიას ინიციატივით გაიმართა, სენაკის მუნიციპალიტეტის მერის პირველი მოადგილე გრიგოლ ბაღათურია, მერის მოადგილე კახაბერ კუპრეიშვილი, ადგილობრივი თვითმმართველობისა და საზოგადოების წარმომადგენლები ესწრებოდნენ.

საცხენოსნო კლუბს მდიდარი წარსული და დიდი ისტორია გააჩნია. როგორც საარქივო მასალებიდან ირკვევა, 1927 წელს ქ. ცხაკაიაში (სენაკი) პირველად ჩატარდა დღესასწაული საცხენოსნო სპორტის სახეობებში: ისინდი, თარჩია, ცხენბურთი, ჩერეზი, მოქნევა, მარულა, ყაბახი, კონკური და სხვა. 1929 წელს გაიმართა ცხენოსნური გადარბენა ქობულეთიდან ცხაკაიაში. 1937 წელს მოეწყო ცხენოსნური გადარბენა აფხაზეთის, სამეგრელოს, ქუთაისის, ცხინვალის, სიღნაღის, ბორჯომის და სხვა რაიონების ცხენოსანთა მონაწილეობით. ცხენოსნურ სპორტში შემდგომ წლებშიც სისტემატურად ეწყობოდა შეჯიბრებები.

სენაკის იპოდრომი ათწლეულების მანძილზე მასშტაბურ საცხენოსნო შეჯიბრებებს მასპინძლობდა.

აღნიშნული ისტორიისა და ტრადიციების ამსახველი ფოტომასალა საცხენოსნო კლუბის დამფუძნებელმა ირაკლი ლაკიამ ჟიული შარტავას სახელობის მხარეთმცოდნეობის მუზეუმს გადასცა.