შიდა ართლის გუბერნატორის ,,მწვანე ბარათები" რუსეთის ბაზარზე

24-09-2019

2019 წლის ზაფხულში, შიდა ქართლის გუბერნატორი გიორგი ხოჯევანიშვილი პირველ საჯარო სკოლას ესტუმრა. მშობლიურ სკოლაში მოსწავლეებს ევროკავშირთან თავისუფალ სავაჭრო სივრცის შესახებ ესაუბრა და აღნიშნა, რომ საქართველოსთვის მნიშვნელოვანია ევროკავშირის ბაზარი.

შიდა ქართლის გუბერნატორს, გიორგი ხოჯევანიშვილს არ უთქვამს, რომ ის გუბერნატორად დანიშვნამდე წარმოადგენდა კომპანიას, რომელიც გადაზიდვებს რუსეთში აწარმოებდა. უფრო მეტიც, 2014-2018 წლებში ის რუსეთის ერთ-ერთი დიდი, თათარსტანის მხარის დედაქალაქის, ყაზანის საკონდიტრო ქარხნის პარტნიორი იყო.

ვიდეო: გიორგი ხოჯევანიშვილი 1-ელ სკოლაში მოსწავლეებს ევროკავშირის ბაზარზე ესაუბრება

შიდა ქართლის გუბერნატორმა გიორგი ხოჯევანიშვილმა დეკლარაციაში არ მიუთითა ეს კომპანია. ჩვენს კითხვაზე, რატომ გააკეთა ეს, წერილობით გვიპასუხა, რომ გუბერნატორად დანიშვნისას ამ კომპანიების მეწილე აღარ იყო. თუმცა, დოკუმენტი სხვა რამეს მეტყველებს.

გიორგი ხოჯევანიშვილი გუბერნატორად 2018 წლის 20 აგვისტოს დაინიშნა. იმავე თვის 23 აგვისტოს კი, გიორგი ხოჯევანიშვილმა ,,ვესტ - ლოჯისტიკი" დატოვა. 2018 წლის ოქტომბრის დეკლარაციაში კი, ეს კომპანია მითითებული არ აქვს, რატომ?

საქმე ეხება კომპანია ,,ვესტ ლოჯისტიკს“ (WEST logistics), რომელიც ჯერ გუბერნატორის ძმამ - ალექსანდრე ხოჯევანიშვილმა სხვა პარტნიორებთან ერთად დააფუძნა, შემდეგ კუთვნილი 15% გიორგი ხოჯევანიშვილს გადაუფორმა. ალექსანდრე ხოჯევანიშვილმა წილი მაშინ დათმო, 2014 წლის დეკემბერში, როდესაც შს სამინისტროში დაიწყო მუშაობა.

გიორგი ხოჯევანიშვილი კი, წილს 2018 წლის 23 აგვისტომდე ფლობდა.  ეს კომპანია 2013 წელს დაფუძნდა შემდეგი შემადგენლობით: მინდია საბანაძე - 27%; ალ.ხოჯევანიშვილი - 15%; ვასილ გეფერაძე - 5%; ალ. გვარიშვილი - 53%; კომპანია ..ვესტ ლოჯისტიკსი“ განთავსდა თბილისში, კოსტავას 47-ში.

დაფუძნებიდან ცოტა ხანში ყველაზე მსხვილმა მეწილემ ალექსანდრე გვარიშვილმა წილი 53% გაუყო რუსეთში მცხოვრებ ბიზნესმენს, 

ყაზანის საკონდიტრო ქარხნის დირექტორს მარატ ტუხვატულინს. მარატ ტუხვატულინი თათარსტანის ერთ-ერთი მსხვილი, კანფეტების და შოკოლადების ქარხნის დირექტორია.

ტუხვატულინი 2018 წლამდე გიორგი ხოჯევანიშვილი პარტნიორი იყო. გუბერნატორი გვწერს, რომ პარტნიორების შერჩევაში მონაწილეობა არ მიუღია.

,,სატრანსპორტო კომპანია ვესტლოჯისტიკი სოფლის მეურნეობის პროდუქციის (სეზონური ხილი და ბოსტნეული) გადაზიდვებს უკრაინაში, რუსეთსა და ბელარუსიაში ახორციელებდა. პროდუქციის გადაზიდვა საქართველოსთან ერთად თურქეთიდანაც ხორციელდებოდა. კოmპანია დააფუძნა რამდენიმე ბიზნესმმენმა და დარგის სპეციალისტებმა, რომელთა უმრავლესობას საქართველოს მოქალაქები წარმოადგენდნენ, ასევე, მათ შორის იყო, რუსეთის მოქალაქე, რომელმაც თავად გამოთქვა ინტერესი აღნიშნული საქმიანობაში ჩართვისა. იქიდან გამომდინარე, რომ კომპანიის მხოლოდ 15%-იან წილს ვფლობდი, ნაკლებად ვიყავი ჩართული კომპანიის მენეჯმენტში და შესაბამისადაც, არ ვიღებდი ერთპიროვნულ გადაწყვეტილებას პარტნიორების შერჩევასა თუ მათთან მოლაპარაკებებში. გეტყვით იმასაც, რომ ჩემი კერძო სექტორში საქმიანობის პერიოდში სულ რამდენიმე წელი ვფლობდი აღნიშულ წილს. ამჟამად, კომპანიის საქმიანობა შეჩერებულია და შესაბამისად, გადაზიდვები აღარ ხორციელდება.” - აღნიშნავს გუბერნატორი გიორგი ხოჯევანიშვილი.  მან ეს კომენტარი წერილობით გამოგვიგზავნა.

2017 წლის დეკემბერში, ტრანსპორტის მინისტრთა ევროპის კონფერენციამ (ECMT), სატვირთო გადაზიდვების მრავალმხრივი კვოტების გადანაწილების შესახებ, 2018 წლის ნუსხა წარადგინა. ამ ნუსხის მიხედვით, ,,ვესტ ლოჯისტიკს“-ს რუსეთისკენ ტვირთების გადაზიდვის კვოტა მიანიჭეს. 6 კვოტიდან 2 კვოტა რუსეთის მიმართულებას ეკუთვნოდა.

მომდევნო წელს, 2018 წლის 30 აპრილს, ტრანსპორტის მინისტრთა ევროპის კონფერენციის (ECMT) მრავალმხრივი ნებართვების გაცემის საკითხთა განმხილველი კომისიის სხდომა გაიმართა.

სხდომის მოწვევა შემდეგმა გარემოებამ გამოიწვია. 2018 წლის 20 აპრილის მონაცემებით რეესტრში არსებული 300 გადამზიდველი კომპანიიდან 176 გადამზიდველს, დარღვევების თაობაზე, გაფრთხილების ოქმები შეუდგინეს. ყველა გადამზიდველს დარღვევების შესახებ ტელეფონის საშუალებით ეცნობათ და დაავალეს, რომ გაფრთხილების წერილები ოფიციალურად ჩაებარებინათ.

გაფრთხილების წერილების საფუძველზე, ,,ვესტ ლოჯისტიკს" ორკვირიანი ვადა, სააღრიცხვო წიგნის „მწვანე ფურცლების“ წარმოსადგენად, მისცეს.

30 აპრილს, საერთო ჯამში, „მწვანე ფურცლები“ წარადგინა 126 გადამზიდველმა კომპანიამ, ხოლო 6 კომპანიამ, მათ შორის, ,,ვესტ ლოჯისტიკსმა" წერილობითი განმარტება წარადგინა.

30 აპრილის სხდომის ოქმში წერია, რომ ,,ვესტ ლოჯისტიკსმა“ და კიდევ ორ კომპანიამ, რომელთა წარმომადგენლები არ გამოცხადდნენ კომისიაზე გაურკვეველი მიზეზების გამო, ვერ დაასაბუთეს „მწვანე ფურცლების“ წარმოუდგენლობის მიზეზი. კომისიამ მათზე გაცემული ECMT ნებართვების გაუქმების თაობაზე გადაწყვეტილება მიიღო, რომელიც ამოქმედდებოდა 2018 წლის 4 ივლისიდან.

თუმცა 4 ივლისამდე კომისის კიდევ ერთი სხდომა გაიმართა. ივნისში შ ახალი გადაწყვეტილება მიიღეს.

ამ გადაწყვეტილების მიხედვით, 6 გადამზიდავ კომპანიას: შპს ვესტ ლოჯისტიკასა და დანარჩენებს, კვლავ ვადა მისცეს. კერძოდ, მათ მიერ წარმოდგენილი წერილობითი განმარტებების განხილვა, (ECMT) მრავალმხრივი ნებართვების გაცემის საკითხთა განმხილველი კომისიის მომდევნო სხდომაზე უნდა მომხდარიყო. მომდევნო სხდომაზე მოწვეული იქნენ აღნიშნული კომპანიის წარმომადგენლები.

,,გთხოვთ გაითვალისწინოთ ზემოთ აღნიშნული და უზრუნველყოთ „მწვანე ფურცლების“ დადგენილ ვადებში წარმოდგენა სააგენტოში, რათა მათ საფუძველზე შეკრებილი სრულყოფილი ინფორმაცია ნებართვების გამოყენების შესახებ დროულად იქნეს გადაცემული პარიზში, საერთაშორისო სატრანსპორტო ფორუმის (ITF) სამდივნოში, გამოყოფილი კვოტების გამოყენების ეფექტურობის ანალიზის მიზნით." - მიმართეს გადაზიდვების კომპანიის ხელმძღვანელებს. 

ამის შემდეგ სახმელეთო სააგენტოს ვებ-გვერდზე ვესტ ლოჯისტიკასთან დაკავშირებით სხვა სხდომის ოქმი აღარაა გამოქვეყნებული.