2-10-2019
"კომედი ჯგუფში" მომხდარი გაყოფის შემდეგ, "რუსთავი 2"-ზე დარჩნენ: ნიკა არაბიძე, ვახო ბიჭიკაშვილი, მიშა ანდღულაძე, ალეკო მალხაზიშვილი, ბექა ონიანი, კობა ბარათელი, სცენარისტების გუნდი... ჰყავთ ახალი, მაყურებლისთვის კარგად ნაცნობი და უცნობი სახეები. როგორი იყო, ჯგუფის გაყოფის პროცესი, რომელი მსახიობები გახდნენ ჯგუფის წევრები, ვინ იქნება ახალი ღამის შოუს ფორმატის გადაცემის წამყვანი, ხედავენ თუ არა ცენზურის საფრთხეს და რომელი იუმორისტული გადაცემებით დაიტვირთება ტელევიზიის საეთერო ბადე?
""რუსთავი 2"-ზე ყველას თავის არგუმენტი ჰქონდა, - დამრჩენსაც და წამსვლელსაც. მგონია, რომ სწორი გადაწყვეტილება მივიღე. დავრჩი იქ, სადაც შეიძლება, ის საქმე ვაკეთო, რასაც აქამდე ვაკეთებდი.
დრო ალბათ ყველაფერს უფრო კარგად აჩვენებს. ხელმძღვანელობისგან მაქსიმალური ხელშეწყობა გვაქვს. გვეუბნებიან, რომ შეგვიძლია ვაკეთოთ ის, რაც გვინდა და როგორც გვინდა. უკვე ვლაგდებით, სამუშაო პროცესში აქტიურად ჩავერთეთ. "კომედი შოუ" ეთერში 21 სექტემბრიდან გავიდა. საზოგადოებისთვის ცნობილი სახეებიდან შემოგვემატნენ: ზურა ნიჟარაძე, ქეთი ხუციშვილი, თაკო აბაშიძე... დაგვიბრუნდნენ ამიკო ჩოხარაძე, ეკა აბშილავა და სიკო ჭუმბურიძე...
"ვისაც ჰგონია, რომ მთავრობის ქებას დავიწყებთ, ცდება, კრიტიკა ხელისუფლებისთვის შეიძლება "წამალიც" კი იყოს. მიმდინარე პოლიტიკურ მოვლენებს აუცილებლად გამოვეხმაურებით", - განუცხადა "გზას" არაბიძემ.