სამართლიანად ჩატარდა თუ არა არჩევნები
ლევან იზორია ეროვნული უსაფრთხოების საბჭოს მდივნის პოსტზე დაინიშნა
13-11-2019
დღეიდან პრემიერის ხელმძღვანელობით, გაძლიერებული ძალისხმევით, კოორდინაციის მაღალი ხარისხითა და ჩვენი სტრატეგიული პარტნიორების ჩართულობის მაღალი დონით უზრუნველვყოფთ იმ სტრატეგიულ ამოცანებს, რომელიც თითოეული მოქალაქისა და ჩვენი ქვეყნის უსაფრთხოებას უკავშირდება, - ამის შესახებ უსაფრთხოების საბჭოს სხდომის დასრულების შემდეგ საბჭოს მდივანმა ლევან იზორიამ განაცხადა.
ლევან იზორიას თქმით, უსაფრთხოების საბჭოს სხდომაზე ყურადღება გამახვილდა ქვეყნის შიგნით არსებულ უსაფრთხოების გამოწვევებზე, რომელიც საქართველოს ტერიტორიულ მთლიანობას უკავშირდება.
„პრემიერის დავალებით დღეიდან აქტიურად შევუდგებით ეროვნული უსაფრთხოების კონცეფციაზე მუშაობას. ასევე, საქართველოს საფრთხეების შეფასების დოკუმენტის განახლებას. ჩვენ განვიხილეთ ქვეყნის შიგნით არსებული უსაფრთხოების გამოწვევები, რომელიც საქართველოს ტერიტორიულ მთლიანობას უკავშირდება, განსაკუთრებით კი ოკუპირებული ცხინვალის რეგიონში მიმდინარე პროცესები იყო განხილვის საგანი“, - განაცხადა ლევან იზორიამ.
როგორც უსაფრთხოების საბჭოს მდივანმა აღნიშნა, ხაზი გაესვა, რომ მნიშვნელოვანია ჩვენს სტრატეგიულ პარტნიორებთან თანამშრომლობის გაძლიერება კიბერუსაფრთხოების სფეროში.
„უსაფრთხოების საბჭოს ფორმატი მოგვცემს შესაძლებლობას, რომ ბატონი პრემიერის ხელმძღვანელობით, უწყებები, რომლებიც პასუხისმგებელნი არიან ქვეყანაში უსაფრთხოებაზე, გააძლიერებენ ერთმანეთში თანამშრომლობის კოორდინაციას.
განვსაზღვრავთ ქვეყნის უსაფრთხოებისთვის მნიშვნელოვან კრიტიკული ინფრასტრუქტურის სიას და ეს ყოველივე იქნება მნიშვნელოვანი წინგადადგმული ნაბიჯი საქართველოს თითოეული მოქალაქის უსაფრთხოების, ქვეყნის ჩრდილოატლანტიკურ სივრცეში ინტეგრაციის და ამით უსაფრთხოების განმტკიცების საქმეში, რათა სწორედ თითოეულის უსაფრთხოებით, ჩვენი ქვეყნის სტაბილური, დემოკრატიული განვითარებით შევქმნათ კეთილდღეობის წინაპირობა. უსაფრთხოების გარეშე კეთილდღეობა წარმოუდგენელია“, - განაცხადა ლევან იზორიამ.
