დადგენილება ქალაქ ბათუმის მერიისა და საკრებულოს თანამდებობის პირებისათვის სარგოების გაზრდის შესახებ 2018 წლის 18 იანვარს იქნა დამტკიცებული, მისი ამოქმედება კი 1 იანვრიდან მოხდა.
საკრებულოს დადგენილებით, ქალაქის მერის ლაშა კომახიძისა და საკრებულოს თავმჯდომარის სულიკო თებიძის თანამდებობრივი სარგო, რომელიც 2750 ლარს შეადგენდა, 4500 ლარამდე გაიზარდა.
„რეგინფო“ წერდა, რომ 2018 წლის 1 იანვრიდან 4500 ლარამდე გაიზარდა ქალაქ რუსთავის მერისა და საკრებულოს თავმჯდომარის ხელფასები, აჭარის 4 მუნიციპალიტეტის - ქობულეთის, ქედის, ხულოს და შუახევის მერებისა და საკრებულოს თავმჯდომარეების ანაზღაურება კი 2650 ლარის ნაცვლად 3500 ლარი გახდა.
2650 ლარიდან 3950 ლარამდე გაიზარდა ბოლნისის მერისა და საკრებულოს თავმჯდომარის სარგოები,ხოლო თეთრიწყაროს მერი და საკრებულოს თავმჯდომარე მიმდინარე წლის 18 იანვრიდან 3600 ლარს მიიღებენ.
შედარებისთვის, საქართველოს პრემიერ-მინისტრის გიორგი კვირიკაშვილის ხელფასი 4280 ლარია, თბილისის მერის კახა კალაძის სარგო კი 3180 ლარს შეადგენს. „საჯარო დაწესებულებში შრომის ანაზღაურების შესახებ“ კანონის შესაბამისად, მათი ხელფასის ოდენობის გაზრდა 2021 წლის 1 იანვრამდე იკრძალება.
