სამართლიანად ჩატარდა თუ არა არჩევნები
"ქართველ ქურდებთან ახლობლობა ხაჯიმბას მთავარი შეცდომა იყო..." - ყოფილ პრეზიდენტს თანაგუნდელები განუდგნენ
7-02-2020
რუსეთის მიერ ოკუპირებულ აფხაზეთში, ე.წ. ვადამდელ არჩევნებამდე სულ უფრო ნაკლები დრო რჩება და შესაბამისად, პოლიტიკური ტემპერატურა მატულობს.
გაერთიანებული ოპოზიციის ერთ-ერთ ყველაზე რეალურ კანდიდატთან ერთად, ბოლო დროს სოხუმის ე.წ. მერი კან კვარჩიაც გააქტიურდა, რომელმაც უკვე გააკეთა განაცხადი პრეზიდენტობის სურვილზე.
ამასობაში, რეგიონში, ე.წ. პრეზიდენტობის კანდიდატის მიმართ მოთხოვნები იცვლება - ის ეთნიკურად აფხაზი უნდა იყოს, ჰქონდეს ე.წ. ადგილობრივი მოქალაქეობა, ფლობდეს აფხაზურ ენას და ასაკით 35-დან 65 წლამდე იყოს.
"პრეზიდენტობის მსურველს წარსულში სწორი პოლიტიკური და ცხოვრებისეული გამოცდილება უნდა ჰქონდეს, ასევე კეთილსინდისიერი წარსული. ქვედა ასაკობრივი ზღვარი 45 წლამდე უნდა გაიზარდოს", - წერენ აფხაზები, რომელთა თქმითაც, აუცილებელია, ლიდერს ჰქონდეს კარგი განათლება და ეროვნულობაზე იყოს ორიენტირებული. თუმცა, აქვე დასძენენ, რომ ახალ თაობას განათლების მხრივ პრობლემები აქვს.
მას შემდეგ, რაც კვარჩიამ "პრეზიდენტობის" სურვილი გამოთქვა, ადგილობრივი მოსახლეობის გარკვეული ნაწილი, მისკენ გადაიხარა. როგორც აფხაზები სოციალურ ქსელში წერენ, განსაკუთრებით აქტიურობენ ეთნიკური სომხები, რომელთა მიმართაც ბოლო დროს აფხაზებში არც ისე კარგი განწყობაა.
არსებული ცნობით, კვარჩიამ ბოლო წლებში თავი იმით გამოიჩინა, რომ 90-იან წლების ქართულ-აფხაზურ ომში ძალზე აქტიური იყო. განსაკუთრებით დაუნდობელი იყო ქართველი ტყვეების მიმართ, რომელთა დახვრეტაც არაერთხელ მოხდა მისი მეთაურობით. ამის გამო, აფხაზი მეომრების აგრესიაც კი დაიმსახურა, "რადგან ტყვეთა გაცვლაში ხელი ეშლებოდათ".
ადგილობრივების თქმით, კვარჩია რაულ ხაჯიმბას კანდიდატურადაც განიხილება, რადგან სწორედ მისი "პრეზიდენტობის" დროს დანიშნეს მერად. პირველ დღეებში მან მკვეთრი განცხადებებით გამოიჩინა თავი და უკანონო ნაგებობებს, მიტოვებულ შენობებს (ქართველების დაკეტილ სახლებს), გარევაჭრობას, სოხუმის მოუწესრიგებელ ბაზარს, კრიმინალს და სხვა პრობლემებს ომი გამოუცხადა, თუმცა, "კოსმეტიკური ცვლილების" გარდა, ბევრი ვერაფერი შეძლო, რადგან ქალაქში სწორედ ასეთი დარღვევებით იშოვება ფული...
"ყველას გვახსოვს მისი ხმაურიანი გაცხადებები, რომ ქალაქი ქალაქს უნდა ჰგავდეს, უკანონო მიშენებებსა და ფარეხებს დაერია, სადაც ხალხს სავაჭრო ფართები და საწყობები ჰქონდა მოწყობილი, მაგრამ ცენტრალურ ქუჩებში მცხოვრები სომეხი ნარკორეალიზატორები არ გახსენებია. ეტყობა "არაფერი იცოდა" და "ვერც შეამჩნია".
მათაც დაუფასეს და ახლა გამალებული უჭერენ მხარს, როგორც მთავარ ლობისტს. გამალებული ცდილობენ ბჟანიას მინუსები წარმოაჩინონ და ერთადერთი რეალური ლიდერი მოღალატედ გაგვაცნონ, რადგან ქართულ მედიასთან თანამშრომლობისთვის მზადაა", - წერს ადგილობრივი ხათუნა აგირბა.
სხვების თქმით, "ცოტა ხანში, აფხაზეთში მთავარ აზრს სომხები შექმნიან, რადგან აფხაზები უმცირესობაში იქნებიან..."
ის, რომ ხაჯიმბას სხვა ყოფილი თანაგუნდელებიც განუდგნენ, მაშინვე გაცხადდა. თუმცა, რამდენიმე დღის წინ, გალის ე.წ. ადმინისტრაციული ხელმძღვანელის თემურ ნადარაიას ინტერვიუმ, რომელიც ხაჯიმბას მთავარ შეცდომებზე საუბრობს, მაინც ყველა გააოცა. ადგილობრივები ფიქრობენ, რომ ნადარია ახლა ცდილობს ახალ ხელისუფლებაშიც იპოვოს ადგილი.
გამოცემა Абхаз Авто ტელეგადაცემა Тет-а-тет-ზე დაყრდნობით წერს, რომ ნადარაია ქვეყანაში კრიმინოგენული ვითარების გამწვავებას სწორედ ხაჯიმბას უკავშირებს:
"არიან ადამიანები, რომლებიც აფხაზურ პოლიტიკაში კრიმინალური სამყროდან მოხვდნენ. თუ ადრე "კანონიერი ქურდები" პოლიტიკისგან შორს იყვნენ, ახლა ისინი პოლიტიკის წარმმართველები არიან და ამ სფეროდან მათი განდევნა არც ისე ადვილია..." - აცხადებს ნადარაია, რომლის თქმითაც, 2014 წელს ალექსანდრე ანქვაბის "ხელოსუფლების" სამხედრო გადატრიალება შეცდომა იყო და ეს ხაჯიმბამ უნდა აღიაროს.
ნადარაიას მედიაში აქტიურობა ადგილობრივებმა ასე ახსნეს:
"ის აცნობიერებს, რომ ალექსნადრე ანქვაბი კვლავაც იბრუნებს პოლიტიკურ სადავეებს, რომლისთვისაც ხელი არც არასდროს გაუშვია, უბრალოდ ახლა ცხადი ხდება, რომ ბოლო პროცესების უკან ის იდგა, ნადარიაია კი ცდილობს მას თავი შეახსენოს, როგორც გალის რაიონში მუშაობის გამოცდილების მქონე კადრი... იმედია, "რკინის ალიკას" ალღო არ დაუკარგავს და გაიძვერების ამოცნობა ისე მისი ძლიერი მხარეა...", - წერს ინტერნეტმომხარებელი "ირაკლი სუხუმსკი".
ბოლომდე ვერავინ ამოხსნა, მაინც სად გადის ალექსანდრე ანქვაბის შესაძლებობების ზღვარი აფხაზეთში, მაგრამ ფაქტია, რომ მას წლებია მუდმივი ელექტორატი ჰყავს, რომელიც მის ყველა არასწორ ნაბიჯს აპრავებს, მათ შორის, "ქართველ კრიმინალებთან ახლო ურთიერთობასაც...
რამდენიმე დღის წინ, აფხაზურ მედიაში გავრცელდა ინფორმაცია იმის შესახებ, რომ ალექსანდრე ანქვაბი და ასლან ბჟანია მოლაპარაკეკებს მართავენ. ადგილობრივი საგაზეთო გამოცემა "Чагемская правда "-ს ცნობით, ანქვაბი და ბჟანია აფხაზეთის განვითარების გზებზე მსჯელობენ. ადგილობრივების ინფორმაციით, - "დიდი ალბათობით, საუბარია, ქართულ მხარესთან ეკონომიკურ თანამშრომლობაზეც, რაც ქვეყანას სასიცოცხლოდ სჭრდება".
