კომპანია „ვერტექსმა“ სახელმწიფო ქონების ეროვნული სააგენტოს მიერ გამოცხადებულ ელექტრონულ აუქციონზე დაბა ბაკურიანში, „დიდველში“ მდებარე 12 468 კვ.მ არასასოფლო-სამეურნეო დანიშნულების სამი მიწის ნაკვეთი 2018 წლის 29 იანვარს იყიდა. მიწის ნაკვეთების ღირებულება ჯამში 1 706 000 ლარია, რაც კომპანიამ 18 თვის ვადაში ეტაპობრივად უნდა გადაიხადოს.
კომპანიასთან დადებული ხელშეკრულება საინვესტიციო ვალდებულებას ითვალისწინებს, რომლის თანახმად არაუმეტეს 4 წლის ვადაში უნდა მოხდეს მიწის ნაკვეთებზე სასტუმროს კომპლექსის აშენება, ექსპლუატაციაში მიღება და ფუნქციონირების დაწყება. ამ მიზნებისათვის „ვერტექსმა“ არანაკლებ 2 000 000 ლარის ინვესტირება უნდა მოახდინოს.
საჯარო რეესტრის მონაცემებით, შპს „ვერტექსი“ 2017 წლის 31 ივლისს დარეგისტრირდა. კომპანიის 100 % წილის მფლობელი და დირექტორი ბიზნესმენი გურამ მწითურიძეა, რომელიც ასევე ფლობს წილებს სხვა კომპანიებშიც: „ვოლგა მოტორსი“, „ბრეტბი“, „ლაბა“ და „იბერია“.
