სამართლიანად ჩატარდა თუ არა არჩევნები
აჭარის მთავრობის პასუხი ოპოზიციის შეთავაზებაზე
9-02-2018
აჭარის მთავრობაში ნაციონალური მოძრაობის შეთავაზებას, ბათუმში მდებარე ხელოვნების უნივერსიტეტის შენობაში მუზეუმი განთავსდეს, ეხმაურებიან.
აჭარის მთავრობის თავმჯდომარის მრჩევლის ბესიკ ლილუაშვილის განცხადების მიხედვით, მთავრობას აღნიშნულ შენობასთან დაკავშირებით ჯერ გადაწყვეტილება არ მიუღია და ხელოვნების უნივერსიტეტის შენობაში მთავრობის აპარატის განთავსება დღის წესრიგში არ დგას.
"აღნიშნულ შენობაში მთავრობის აპარატის განთავსება ამ ეტაპზე არ განიხილება და ეს საკითხი დღის წესრიგში არ დგას. რაც შეეხება თავად შენობას, საზოგადოებამ ძალიან კარგად იცის, რომ აღნიშნული შენობა მათი ხელისუფლების დროს იმგვარად იყო დაპროექტებული და გაკეთებული შიდა გეგმარება, რომ იქ უნდა გადასულიყო მთავრობის აპარატი. თუმცა მინდა, დავამშვიდო ჩვენი ოპონენტები და ვუთხრა, რომ აღნიშნული შენობის სამომავლო ბედის შესახებ მთავრობის გადაწყვეტილება არ იქნება ნაჩქარევი და ერთ დღეში მიღებული, როგორც ეს თავად გააკეთეს 2012 წელს. გაიმართება მსჯელობა და კონსულტაციები, თუ რა განთავსდება აღნიშნულ შენობაში და მხოლოდ ამის შემდეგ იქნება მიღებული გადაწყვეტილება" - განაცხადა ბესიკ ლილუაშვილმა.
