ლანჩხუთის „გურიას“ სამწვრთნელო შტაბი მუნიციპალიტეტის მერს და საკრებულოს თავმჯდომარეს შეხვდა

2-06-2020

ლანჩხუთის „გურიას“ სამწვრთნელო შტაბი ლანჩხუთის მუნიციპალიტეტის მერს, ალექსანდრე სარიშვილსა და საკრებულოს თავმჯდომარე, ბესიკ ტაბიძეს შეხვდა.

სამომავლო გეგმებზე კლუბის ახალმა სპორტულმა დირექტორმა, გიგა სურმავამ ისაუბრა.

"ჩვენი მიზანია, შევქმნათ ძლიერი გუნდი და ეტაპობრივად მივაღწიოთ წარმატებებს. ყველაფერს ნულიდან ვიწყებთ, იქნება ცვლილებებიც. გუნდს ლევან ხომერიკი, ვანო მახარაძე და გიგლა იმნაძე გაწვრთნიან. ფეხბურთელების ფიზმომზადებას კახა ვაჩეიშვილი ჩაუდგება სათავეში. მეკარეებს გია გოგუა გაწვრთნის".

რაც შეეხება გუნდის შეკრებას, სპორტული დირექტორი ამბობს, რომ გრიგოლეთის საფეხბურთო ბაზაზე მოხდება შეკრება, თუმცა კორონავირუსის გამო, დაცული და გათვალისწინებული იქნება ფეხბურთის ფედერაციისა და ჯანდაცვის სამინისტროს რეკომენდაციები.

"იმედი მაქვს თქვენი შემართება და ძალისხმევა „გურიას“ ძველ სახელსა და დიდებას დაუბრუნებს. წარმატებებს გისურვებთ", - განაცხადა ალექსანდრე სარიშვილმა.