ქვემო ქართლის ტელეკომპანიის ინფორმაციით, ადგილზე მხოლოდ ერთი სადაზღვევო პუნქტი და სადაზღვევო აგენტი მუშაობს, რამაც რიგები შექმნა. მძღოლების თქმით, მოლოდინის რეჟიმში არიან ავტობუსების მგზავრებიც, რომელთა შორის მცირეწლოვანი ბავშვებიც არიან. „უკვე 10 საათია აქ ვარ, რიგში. მხოლოდ ერთი აგენტი მუშაობს და ერთი მანქანის გატარებას თითქმის ერთი საათი უნდება. აბა, ეს საქმეა?“, - ციტირებს ერთ-ერთი მძღოლის კომენტარს ქვემო ქართლის ტელევიზია.
მძღოლების თქმით, ისინი სადაზღვევო პაკეტის შეძენას ვერც ინტერნეტის საშუალებით ახერხებენ.
უცხოეთში რეგისტრირებული ავტოტრანსპორტის სავალდებულო დაზღვევა 1-ლი მარტიდან ამოქმედდა. იმ შემთხვევაში, თუ ტრანსპორტი დაზღვეული არ იქნება, სატრანსპორტო საშუალება 100-დან 200-მდე ლარით დაჯარიმდება.
უცხო ქვეყნის ავტოტსატრანსპორტო საშუალებებს სავალდებულო დაზღვევის ცენტრი აზღვევს. როგორც ცენტრში განმარტეს, ამ დროისთვის მართლაც არსებობს ტექნიკური ხარვეზი, რომლის გამოსწორებაზე მუშაობა მიმდინარეობს.
