„რაც შეეხება ექსპერტიზის დასკვნებს და სხვა მტკიცებულებებს, ამაზე ჩვენ დეტალურად ვისაუბრებთ მხოლოდ მას შემდეგ, რაც ამოვწურავთ საგამოძიებო მოქმედებებს, მივიღებთ შესაბამის სამართლებრივ გადაწყვეტილებას. მხოლოდ ამის შემდგომ ვისაუბრებთ სისხლის სამართლის საქმეში არსებულ მტკიცებულებაზე, მათ შორის ექსპერტიზის დასკვნებზე“, – განაცხადა ჟურნალისტებთან ირაკლი შოთაძემ.
სახელმწიფო უსაფრთხოების სამსახურის გადაწყვეტილებით, ხელყუმბარა, მისი ვარგისიანობის დადგენის მიზნით, ექსპერტიზის ფარგლებში 19 იანვარს ააფეთქეს. ადვოკატებს მიაჩნიათ, რომ ეს მოქმედება ეჭვებს აჩენს ყველაზე მნიშვნელოვანი მტკიცებულებების ხელოვნურად განადგურებაზე, ამასთან, ოჯახის ადვოკატებს, ხელყუმბარაზე დამოუკიდებელი ექსპერტიზის ჩატარების შესაძლებლობა აღარ აქვთ.
თემირლან მაჩალიკაშვილი 26 დეკემბერს, გვიან ღამით, სახელმწიფო უსაფრთხოების სამსახურის მიერ პანკისში ჩატარებული სპეცოპერაციის დროს, სპეცრაზმმა თავის არეში დაჭრა. სუს-ში აცხადებენ, რომ თემირლან მაჩალიკაშვილი დაკავებისას შეეცადა წინააღმდეგობა გაეწია სამართალდამცავებისთვის, კერძოდ უნდოდა მოქმედებაში მოეყვანა ხელყუმბარა, რა დროსაც დანაშაულებრივი ქმედების აღსაკვეთად უკიდურესი აუცილებლობიდან გამომდინარე გამოყენებული იქნა პროპორციული ძალა და მოხდა თემირლან მაჩალიკაშვილის მისამართით გასროლა. თემირლან მაჩალიკაშვილი 10 იანვარს გარდაიცვალა.
მაჩალიკაშვილის დაჭრის ფაქტს პროკურატურა სისხლის სამართლის კოდექსის 333-ე მუხლის მე-3 ნაწილით იძიებს, რაც ძალადობით სამსახურებრივი უფლებამოსილების შესაძლო გადამეტებას გულისხმობს.
