უკრაინელი ჟურნალისტები აჭარის შესახებ რეპორტაჟებს ამზადებენ

28-03-2018

აჭარის შესახებ უკრაინელი ჟურნალისტები ტელესიუჟეტებს ამზადებენ. აჭარის ტურიზმის დეპარტამენტის მოწვევით რეგიონს უკრაინაში პოპულარული ტელეარხების "1+1"-სა და "UA-First" გადამღები ჯგუფები სტუმრობენ. ისინი რეგიონის ტურისტულ პოტენციალს ეცნობიან. ამის შესახებ ინფორმაციას აჭარის ტურიზმისა და კურორტების დეპარტამენტი ავრცელებს. 

„ჟურნალისტებმა უკვე გადაიღეს აჭარული ხაჭაპურის მასტერკლასები, ბათუმის ძირითადი ტურისტული ღირსშესანიშნაობები, ფოლკლორი და მთიანი აჭარის ტურისტული პროდუქტები. ისინი ასევე მოამზადებენ სიუჯეტებს, თუ რა სიახლეები დახვდება ტურისტებს აჭარაში და როგორ ემზადება რეგიონი ტურისტული სეზონისთვის. ისინი შეხვდნენ აჭარის ტურიზმის დეპარტამენტის თავმჯდომარე სულხან ღლონტს, რომელმაც ჟურნალისტებს 2018 წელს დაგეგმილი პროექტები გააცნო. ჟურნალისტები რეგიონს დღეს დატოვებენ“, - ნათქვამია აჭარის ტურიზმისა და კურორტების დეპარტამენტის მიერ გავრცელებულ განცხადებაში. 

მათივე ინფორმაციით, გასულ წელს 500-მდე ჟურნალისტი, ბლოგერი და ტურისტული სააგენტოს წარმომადგენელი სტუმრობდა რეგიონს. 
„წელს ჩვენ ვაგრძელებთ აჭარის პოპულარიზაციას სამიზნე ქვეყნების მედიასაშუალებების მეშვეობით. საერთაშორისო მედია დიდ ყურადღებას იჩენს ჩვენი რეგიონის მიმართ და რა თქმა უნდა, მათ მიერ მომზადებული თითოეული სტატია, რეპორტაჟი თუ გადაცემა იწვევს ჩვენი პოტენციური ტურისტების დაინტერესებას აჭარითა და ზოგადად ჩვენი ქვეყნით. ამჯერად, უკრაინელ ჟურნალისტებს ვმასპინძლობთ. ბუნებრივია ისინი არიან ძალიან პოპულარული ტელეკომპანიების წარმომადგენლები და ჩვენთვის მნიშვნელოვანია მათ ჩვენს პოტენციურ ტურისტებს მიაწოდონ სანდო და კარგად მომზადებული რეპორტაჟები. რა თქმა უნდა, ჩვენ წლის ბოლომდე გავაგრძელებთ პრეს და ინფოტურების ორგანიზებას სამიზნე ქვეყნებიდან,”- განაცხადა აჭარის ტურიზმის დეპარტამენტის თავმჯდომარე სულხან ღლონტმა.

"ინტერპრესნიუსი"