მდინარე მტკვრის დაცვის დღესთან დაკავშირებით მოსწავლეებისთვის ტრენინგი გაიმართა

2-06-2021

2 ივნისი მტკვრის დაცვის დღეა. ამ დღესთან დაკავშირებით გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის წარმომადგენლები თბილისის 69-ე საჯარო სკოლის V- VI კლასის მოსწავლეებს შეხვდნენ და წყლის რესურსების მნიშვნელობაზე და მისი დაცვისთვის საჭირო ქმედებებზე ტრენინგი ჩაუტარეს.

სოფლის მეურნეობისა და გარემოს დაცვის სამინისტროს პრესსამსახურის ინფორმაციით, მოსწავლეებმა მოისმინეს მტკვრის, როგორც ტრანსსასაზღვრო მდინარის და მისი მონიტორინგის შესახებ მნიშვნელოვანი ინფორმაცია.

შეხვედრა კითხვა-პასუხის რეჟიმში გაგრძელდა და მოსწავლეებმა მათთვის საინტერესო საკითხებზე პასუხები მიიღეს.

მტკვრის დაცვის დღე 1999 წელს დაარსდა, რომელიც საქართველოში, სომხეთსა და აზერბაიჯანში ერთდროულად აღინიშნება. მტკვარი საქართველოს ყველაზე მთავარი მდინარეა.

მდინარის მთლიანი სიგრძე 1515 კილომეტრს შეადგენს, საქართველოს ტერიტორიაზე მტკვრის სიგრძე 400 კილომეტრია.