სულხან ზუმბურიძეს სააქციო საზოგადოების მმართველთა საბჭოს თავმჯდომარის თანამდებობა 2007 წლის დეკემბრიდან უკავია. ოფიციალურად დეკლარირებული მონაცემებით, მისი წლიური ანაზღაურება 2016 წელს 326 603 ლარს შეადგენდა, 2015 წელს - 335 656 ლარს, 2014 წელს - 263 374 ლარს, 2013 წელს კი 218 329 ლარი იყო.
სულხან ზუმბურიძის მეუღლე ქეთი რეხვიაშვილი კომუნიკაციების ეროვნულ კომისიაში მთავარი სპეციალისტია, სადაც მან 2017 წელს მიიღო 92 848 ლარის ოდენობით ხელფასი, ანუ საშუალოდ თვეში 7737 ლარი.
შედარებისთვის, საქართველოს პრეზიდენტის წლიური ხელფასი 82 800 ლარია, ე.ი. თვეში 6900 ლარი, პარლამენტის თავმჯდომარისა - 80 000 (თვეში საშუალოდ 6670 ლარი), პრემიერ-მინისტრის შრომის ანაზღაურება კი 2017 წელს 51 000 ლარი, ანუ თვეში საშუალოდ 4250 ლარი იყო.
„საქართველოს სახელმწიფო ელექტროსისტემა“ ელექტროენერგიის გადამცემი სისტემის ოპერატორია. კომპანია საქართველოს მთელ ტერიტორიაზე ფლობს და ექსპლუატაციას უწევს 3350 კმ სიგრძის ელექტროგადამცემ ხაზებსა და 90 ქვესადგურს. კომპანიის აქციების სრულ პაკეტს ფლობს „საპარტნიორო ფონდი“, ორგანიზაციის მართვის უფლება კი გადაცემული აქვს ეკონომიკისა და მდგრადი განვითარების სამინისტროს.
