„პროგრამა გათვლილია ადამიანებზე, რომლებსაც აქვთ აქტიური იდეები, განსაკუთრებით, ეს არის რეგიონებზე გათვლილი. ამიტომ არის, სწორედ, ფერმერების ჩართულობა ამ პროგრამაში განსაკუთრებით ხაზგასმული. ახალგაზრდების ჩართულობა ჩვენი ქვეყნის აღმშენებლობის საქმეში არის უაღრესად მნიშვნელოვანი. ჩვენს ქვეყანას სჭირდება თამამი იდეები, თამამი გადაწყვეტილებები და სწორედ, თქვენი ასაკია ის ასაკი, როდესაც ეს ყველაზე ადვილია“, – მიმართა პრემიერ-მინისტრმა პროგრამის პრეზენტაციაზე მყოფ მეწარმეებს.
მისივე თქმით, „ახალგაზრდა მეწარმე“ ძალიან მნიშვნელოვანი ახალი ტალღაა მცირე და დამწყები საწარმოების განვითარებისთვის.
„პროგრამა ითვალისწინებს 18-დან 40 წლამდე დამწყები მეწარმეების წახალისებას - 40 %-იანი გრანტია გათვალისწინებული. ასევე, გათვალისწინებულია საკონსულტაციო დახმარება. მთავრობა და ეკონომიკური გუნდი მუშაობს ძალიან აქტიურად, რათა მცირე და საშუალო მეწარმეებისთვის კაპიტალში ინექციების წახალისება მოხდეს, ანუ ის პროექტები, რომლებიც იქნება კომერციულად სიცოცხლისუნარიანი და რომლებსაც კაპიტალის, ანუ თანამონაწილეობის ნაკლებობა ექნებათ. ამ მიმართულებითაც ვმუშაობთ და ეს იქნება კიდევ ერთი დამატებული ტალღა“, – აღნიშნა გიორგი კვირიკაშვილმა.
სოფლად ახალგაზრდა მეწარმეების მხარდაჭერის პროგრამას სოფლის მეურნეობის პროექტების მართვის სააგენტო განახორციელებს. პროგრამის ბიუჯეტი 4 110 000 აშშ დოლარია.