დანარჩენი დაზარალებულებიდან ერთ-ერთს კბილები აქვს ჩამტვრეული, მეორეს კი დაზიანებები მუცლის არეში აქვს მიყენებული.
ინციდენტი 15 აპრილს მოხდა. „კვირაცხოვლობა იყო. ჩემმა ორმა შვილმა და მათმა ორმა მეგობარმა დღესასწაული რესტორანში აღნიშნეს. ამის შემდეგ ერთი შვილი სახლში წამოვიდა, ვასიკო და ორი მეგობარი კი ბაზრის მიმდებარე ტერიტორიაზე ტაქსის დასაქირავებლად გადავიდნენ. მსუბუქად ნასვამები იყვნენ. ადგილზე მისულებმა ნახეს, რომ ტაქსისტები კაზინოში იყვნენ. ამიტომ მათ დასაძახებლად შენობაში შესვლა სცადეს. დაცვის თანამშრომელი არ უშვებდა. აქ თუ შეხვალთ, უნდა ითამაშოთ კიდეცო. ხელი უკვრიათ და უზრდელურად მიუმართავთ. ამის შემდეგ დაიწყო ჩხუბი. გაწევ-გამოწევა რომ დაიწყო, ვასო გაერიდა და გზის მეორე მხარეს გადავიდა. დაცვის ერთი თანამშრომელი დაედევნა და სასტიკად ცემა. ორი ახალგზარდა კი კაზინოში ცემეს“, - უთხრა „რეგინფოს“ ვასო მაისურაძის დედამ, მაია მაისურაძემ.
მისივე თქმით, თვითმხილველებისგან იცის, რომ ინციდენტს ათზე მეტი ადამიანი და კრიმინალური პოლიციის თანამშრომლებიც შეესწრნენ, თუმცა სამართალდამცავებმა რეაგირება არ მოახდინეს.
„პოლიციამ გამოძიება კი დაიწყო, მაგრამ არავინ დაუკავებიათ. ვიდრე ვასო გონზე არ მოვა და არ დავკითხავთ, ვერავის დავაკავებთო, ასე მითხრეს პოლიციაში. არც მოწმეები დაუკითხავთ, საერთოდ არაფერს აკეთებენ“, - აღნიშნავს დაშავებულის დედა.
შინაგან საქმეთა სამინისტროში განაცხადეს, რომ მომხდართან დაკავშირებით გამოძიება სისხლის სამართლის კოდექსის 126-ე, ძალადობის მუხლით მიმდინარეობს: „დადგენილია შესაძლო დამნაშავე - ერთი პირი. სხვა პირების გამოვლენის მიზნით საგამოძიებო მოქმედებები გრძელდება. ამ ეტაპზე არავინ არის დაკავებული. ველოდებით ექიმის დასკვნას - ნაცემი მამაკაცის ჯანმრთელობის მდგომარეობის თაობაზე“.
„რეგინფოს“ ინფორმაციით, ეს კაზინოს დაცვის თანამშრომლების მხრიდან ძალადობის პირველი შემთხვევა არ არის.
