მიხეილ ჩხენკელმა გაეროს განვითარების პროგრამის (UNDP) ახალ წარმომადგენელთან თანამშრომლობის გაძლიერების შესაძლებლობები განიხილა

16-11-2021

საქართველოს განათლებისა და მეცნიერების მინისტრმა მიხეილ ჩხენკელმა გაეროს განვითარების პროგრამის (UNDP) ახალ წარმომადგენელს ნიკ ბერესფორდს უმასპინძლა და მასთან პროფესიული განათლების მიმართულებით თანამშრომლობის გაღრმავების საკითხები განიხილა.

მინისტრმა მადლობა გადაუხადა ნიკ ბერესფორდსმრავალწლიანი ნაყოფიერი თანამშრომლობისთვის და საქართველოს განათლების სისტემის ყველა საფეხურის მხარდაჭერისათვის.მიხეილ ჩხენკელმა განსაკუთრებულად გამოყო პროფესიული განათლება და გაეროს განვითარების პროგრამის (UNDP) ახალ წარმომადგენელს ამ მიმართულებით მიმდინარე რეფორმა გააცნო.

მინისტრმა ხაზი გაუსვა, რომ საქართველომ შეძლო უპრეცედენტო და სრულიად ინოვაციური მართვის მოდელის დანერგვა. კერძო-საჯარო პარტნიორობით დაფუძნდა პროფესიული უნარების სააგენტო, რომელიც პროფესიული განათლების ეფექტიანი მართვის თვალსაზრისით სრულიად ახალი სიტყვაა. სააგენტო ხელს შეუწყობს სფეროს განვითარებას ბაზრის მოთხოვნების შესაბამისად და კერძო და საჯარო სექტორებს შორის თანამშრომლობას სისტემურ და ორგანიზებულ ხასიათს შესძენს.

ნიკ ბერესფორდმა დადებითად შეაფასა პროფესიული განათლებისმართვის აღნიშნული მოდელი და, თავის მხრივ, ხაზი გაუსვა დამსაქმებლების ჩართვის მნიშვნელობას ბაზრის მოთხოვნების შესაბამისი უნარებით აღჭურვილი კადრების მოსამზადებლად. გაეროს განვითარების პროგრამის (UNDP) ახალმა წარმომადგენელმა ამ მიმართულებით საქართველოს მხარდაჭერის მზაობა გამოთქვა.

შეხვედრაზე მხარეებმა ასევე განიხილეს პროფესიული განათლების მართვის დიფერენცირებული მოდელი, რომელიც დეცენტრალიზაციას შეუწყობს ხელს. საუბარი ასევე შეეხო საერთაშორისო სტანდარტის მომზადება-გადამზადების პროგრამების მრავალფეროვანი არჩევანის შეთავაზების აუცილებლობას, რაც ყველა ასაკის ადამიანს ახალი შესაძლებლობებისკენ გაუხსნის გზას და სოციალური და ეკონომიკური გამოწვევების დაძლევას შეუწყობს ხელს.

მიხეილ ჩხენკელმა ხაზი გაუსვა გაეროს განვითარების პროგრამის მხრიდან პროფესიული განათლების ინტერნაციონალიზაციის მხარდაჭერის მნიშვნელობას. მინისტრმა აღნიშნა, რომ პრემიერ-მინისტრის, ბატონი ირაკლი ღარიბაშვილის ინიციატივით, სასწავლო პროცესში ჩაერთვებიან უცხოელი სპეციალისტები, რაც საერთაშორისო სტანდარტის სწავლებას შეუწყობს ხელს. ასევე, გაგრძელდება ხელმისაწვდომობის ზრდა და ყველა მუნიციპალიტეტში შეთავაზებული იქნება ადგილობრივი მოთხოვნის შესაბამისი პროგრამები.

სამინისტროში გამართულ შეხვედრას განათლებისა და მეცნიერების მინისტრის მოადგილე თამარ ქიტიაშვილი და გაეროს განვითარების პროგრამის ეკონომიკური განვითარების მიმართულების ხელმძღვანელი გიორგინანობაშვილი ესწრებოდნენ.