სამართლიანად ჩატარდა თუ არა არჩევნები
აჭარაში ბავშვების სექსტრეფიკინგისა და ვაჭრობის შემთხვევები დაფიქსირდა
1-05-2018
სახალხო დამცველის 2017 წლის ანგარიშის მიხედვით, საქართველოში ადამიანით ვაჭრობის 21 ფაქტზე გამოძიება დაიწყო. ინფორმაციას „აჭარის ტელევიზია“ ავრცელებს.
აქედან სამართალდამცველებმა სისხლის სამართლის საქმე აჭარაში ბავშვით ვაჭრობის ერთ და სექსტრეფიკინგის 6 ფაქტზე აღძრა.
ადამიანის ვაჭრობის კუთხით, ხშირი სექსუალური ხასიათის ტრეფიკინგია. ზემოთ აღნიშნული 21 საქმიდან, 15 სექსუალური ექსპლუატაციას ეხება და ყველაზე მეტი შემთხვევა, ზღვისპირა რეგიონზე მოდის.
სექსტრეფიკინგის დანაშაულებები ჩადენილია: 1 აზერბაიჯანში, 14 საქართველოში. 6 სავარაუდოდ, აჭარაში, 3 თბილისში, 1 შიდა ქართლში, ხოლო 4 ქვემო ქართლში.
სხვა საქმეები ეხება შრომით ექსპლუატაციას, მათ შორის ბავშვების.
შიდა ქართლში დაფიქსირდა როგორც სექსუალური, ისე შრომითი ექსპლუატაციის ერთი შემთხვევა, აფხაზეთში კი იძულებითი შრომის ერთი შემთხვევა.
ქვემო ქართლში საქმე აღიძრა როგორც სრულწლოვანის, ისე არასრულწლოვნის შრომითი ექსპლუატაციის მუხლით.
არასრულწლოვნის მიმართ იძულებითი შრომის ფაქტები აჭარასა და თბილისში დაფიქსირდა, ძალოვანები 2 ბავშვის ყიდვა-გაყიდვის ფაქტს იძიებენ.
ადამიანით ვაჭრობის რაოდენობის მიხედვით, საქართველო მოწინავე ქვეყნებს შორისაა. ომბუდსმენის აპარატი წყაროდ ამერიკის შეერთებული შტატების სახელმწიფო დეპარტამენტის ანგარიშს იყენებს, სადაც საქართველო, ტრეფიკინგის მიმართულებით, 2016-17 წლებში, პირველ კალათაში ინარჩუნებს ადგილს.
აშშ-ს ანგარიშში ხაზგასმულია, რომ საქართველო გოგონების და ქალების სექსტრეფიკინგის, ასევე, მამაკაცების, ქალების და ბავშვების შრომითი ექსპლუატაციის წყარო და სატრანზიტო ქვეყანაა.
ადამიანით ვაჭრობა (ტრეფიკინგი) ადამიანის უფლებათა დარღვევის ერთ-ერთი მძიმე ფორმაა. ყოველწლიურად მთელ მსოფლიოში მილიონობით ადამიანი ხდება ტრეფიკინგის მსხვერპლი, განსაკუთრებით მოწყვლად ჯგუფს წარმოადგენენ ქალები და ბავშვები.
